Xitoy tarkibidagi Tibet avtonom hududida kuchli zilzila qayd etildi. Bu haqda Xitoy va AQSH geologiya xizmatlariga tayanib, Al Jazeera xabar berdi.
Ma’lum qilinishicha, zilzila Shigatze shahrida yuz bergan. Uning silkinishlari yuzlab kilometr uzoqlikdagi Nepalda ham sezilgan. Xitoy zilzila tarmoqlari markazi mahalliy vaqt bilan soat 09:05 da 10 km chuqurlikda 6,8 balli zilzilani qayd etgan. AQSH Geologiya xizmati esa zilzila kuchini 7,1 magnituda deb baholagan.
Hodisa oqibatida 32 kishi halok bo‘lgani aytilmoqda. Qurbonlar soni ortishi mumkin. 6,8 magnitudali zilzila kuchli hisoblanadi va jiddiy zarar yetkazishi mumkin.
Xitoyning janubi-g‘arbiy qismlarida tez-tez zilzila kuzatiladi. 2008-yilda Sichuan provinsiyasida sodir bo‘lgan kuchli zilzila oqibatida 70 mingga yaqin kishi halok bo‘lgandi.
So‘nggi besh yil ichida Shigatse zilzilasidan 200 km uzoqlikda uch yoki undan ortiq magnitudali 29 ta zilzila qayd etilgan. 2015-yilda qo‘shni Nepaldagi Katmandu yaqinida 7,8 magnitudali zilzila sodir bo‘lgandi, bu mamlakatda kuzatilgan eng dahshatli zilzilada 9000 ga yaqin odam halok bo‘lgan va minglab odamlar jarohatlangan.
Izoh (0)