AQSH Savdo vazirligi milliy xavfsizlik nuqtai nazaridan Xitoy dronlarini AQSHda cheklash yoki taqiqlashga olib kelishi mumkin bo‘lgan yangi qoidalarni ko‘rib chiqayotganini ma’lum qildi.
Vazirlik ma’lumotiga ko‘ra, Xitoy va Rossiya tahdidlari “raqiblarga ushbu qurilmalarga masofadan kirish va manipulyatsiya qilish imkoniyatini berishi mumkin, bu esa AQSHning maxfiy ma’lumotlarini xavf ostiga qo‘yadi”.
AQSHda sotiladigan tijorat dronlarining aksariyati Xitoyda ishlab chiqarilgan.
2024-yilning sentyabr oyida AQSH savdo vaziri Jina Raymondo vazirlik avvalroq taklif qilingan Xitoy transport vositalarini AQSHda amalda taqiqlashga o‘xshash cheklovlar kiritishi mumkinligini aytgan edi. Bunda asosiy e’tibor Xitoy va Rossiya uskunalari, chiplari va dasturiy ta’minotiga ega dronlarga qaratiladi.
Raymondo 20-yanvarga qadar Xitoy avtomobillariga nisbatan qoidalarni ishlab chiqish yakunlanishiga umid bildirgan. Xitoy dronlarini cheklash yoki taqiqlash to‘g‘risidagi qarorni 20-yanvar kuni lavozimga kirishayotgan bo‘lajak prezident Donald Tramp ma’muriyati qabul qiladi. So‘nggi bir yil ichida AQSH Xitoy dronlariga qarshi bir qator choralar ko‘rdi. Xususan, Jo Bayden dekabr oyida Xitoyning DJI va Autel Robotics kompaniyalari tomonidan ishlab chiqarilgan yangi dron modellarini sotishni taqiqlovchi qonunni imzolagan.
DJI dunyodagi eng yirik dron ishlab chiqaruvchisi bo‘lib, AQSHdagi barcha tijorat dronlari savdosining yarmidan ko‘pi uning hissasiga to‘g‘ri keladi.
Sentyabr oyida Vakillar palatasi AQSHda yangi DJI dronlarini ishlatishni taqiqlash uchun ovoz bergan.
Oktyabr oyida DJI Mudofaa vazirligini Pekin harbiylari bilan hamkorlik qilayotgani taxmin qilinayotgan kompaniyalar ro‘yxatiga kiritgani uchun sudga berdi va bu taxminlar noto‘g‘ri ekanligini hamda kompaniyaga moliyaviy zarar yetkazganini aytdi.
Amerika qonunchilari bir necha bor DJI dronlari ma’lumotlarni uzatish, kuzatish va milliy xavfsizlikka tahdid solishi mumkinligidan xavotir bildirishgan, bu esa kompaniya tomonidan rad etilgan. 2019-yilda Kongress Pentagonga Xitoyda ishlab chiqarilgan dronlar va butlovchi qismlarni sotib olish yoki ulardan foydalanishni taqiqlagan.
Izoh (0)