Vashington Markaziy Osiyo ishlariga aralashayotganini ma’lum qildi

Vashington mintaqaviy axborot makonida Rossiya va Xitoyni obro‘sizlantirish uchun Markaziy Osiyo OAVlariga pul tikmoqda. Bu haqda AQSH davlat kotibining Janubiy va Markaziy Osiyo bo‘yicha yordamchisi Donald Lu ma’lum qildi.

Biz Janubiy va Markaziy Osiyoda muhim kurash olib bormoqdamiz. Bu XXR bilan raqobatlashish, Rossiya va Xitoy dezinformatsiyasiga qarshi kurashish va terrorchilik faoliyatining oldini olish uchun kurashdir, dedi Lu AQSH Kongressining Tashqi ishlar qo‘mitasiga chiqishidan oldin bergan ko‘rsatmasida.

Lu Markaziy Osiyoni “AQSHning Xitoy va Rossiya bilan raqobati uchun muhim maydon” deb atagan. U to‘g‘ridan to‘g‘ri “Rossiya OAVlariga muqobil” yaratish maqsadida mahalliy nashrlarga moliyaviy yordam ko‘rsatilayotganini aytgan.

Xususan, davlat kotibi yordamchisining so‘zlariga ko‘ra, Amerika pullari Qozog‘istondagi ommaviy axborot vositalari tomonidan qabul qilinmoqda.

Bu “faktga asoslangan kontent” yaratishga yordam beradi, shuningdek, “Rossiya va boshqa mamlakatlar aralashuvi darajasini pasaytirishga yordam beradi”, deyiladi xabarda.