Ukraina Peace loyihasi doirasida Jahon bankidan yana 4,8 milliard dollar oladi. Bu haqda Ukraina bosh vaziri Denis Shmigal ma’lum qildi.
“Biz ushbu yordamni moliyalashtirib, mamlakatimiz va xalqimizga zaruriy yordam ko‘rsatayotgan Qo‘shma Shtatlar va rivojlanish bo‘yicha hamkorlardan juda minnatdormiz”, deya ta’kidlagan u.
DPA agentligining qayd etishicha, Rossiya-Ukraina urushi boshlanganidan beri Kiyev faqat byudjet xarajatlari uchun ittifoqchilaridan 100 milliard dollardan ortiq mablag‘ olgan. Pullarning salmoqli qismi kreditlar ko‘rinishida taqdim etilgan.
Yevropa ittifoqi davlatlari AQSH yordamni kamaytirsa, Kiyevni qo‘llab-quvvatlashga tayyor
Yevropa ittifoqining eng yirik iqtisodga ega davlatlari, xususan, Germaniya, Fransiya, Italiya va Ispaniya, shuningdek, YIga aʼzo bo‘lmagan Buyuk Britaniya Ukrainaga harbiy va moliyaviy yordam berishga tayyorligini bildirgan.
“Men AQSHning Kiyevni qo‘llab-quvvatlashdagi ishtirokini kamaytirish ehtimoli munosabati bilan YIning eng yirik mamlakatlari Ukrainaga harbiy va moliyaviy yordam yukini o‘z zimmasiga olish qarorini hurmat bilan qayd etaman”, deydi Polsha TIV rahbari Radoslav Sikorskiy.
Varshavada bo‘lib o‘tgan ushrashuvda davlatlar Donald Tramp Oq uyga qaytganidan keyin YI va AQSH o‘rtasidagi munosabatlarni rivojlantirish haqida fikr almashgan.
Avvalroq Jahon banki Ukrainaga 750 million dollar miqdorida yangi yordam paketini e’lon qilgan edi. Shmigalga ko‘ra, mablag‘lar Yevropa ittifoqiga qo‘shilish uchun zarur bo‘lgan institutsional islohotlarni qo‘llab-quvvatlashga qaratilgan “Sog‘lom fiskal boshqaruv orqali tiklanishni qo‘llab-quvvatlash” loyihasi doirasida taqdim etiladi.
Ushbu mablag‘ning bir qismi Yaponiya hukumati tomonidan qo‘llab-quvvatlanadigan Advance Ukraine jamg‘armasidan ajratiladi
Izoh (0)