Xitoy Tashqi ishlar vazirligi Rossiya-Ukraina tomonlarini raketa zarbalari almashinuvidan keyin vazminlikka chaqirdi. Bu haqda vazirlik rasmiy vakili Lin Jian brifing chog‘ida ma’lum qildi.
“Hozirgi sharoitda barcha tomonlar xotirjam va vazminlikni saqlab turishlari, muloqot va maslahatlashuvlar orqali vaziyatni sovutishga harakat qilishlari, imkon qadar tezroq o‘t ochishni to‘xtatishga erishish uchun inqirozni siyosiy yo‘lga qo‘yishda sharoit yaratishlari kerak”, dedi u.
Xitoy avval ham bir necha marotaba mojaro taraflarini deeskalatsiyaga chaqirgan edi.
Putin 21-noyabr kuni Ukrainadagi obyektga ballistik raketa zarbasi berilganini tasdiqlagan edi.
Uning so‘zlariga ko‘ra, sinovlar muvaffaqiyatli o‘tgan, armiya ko‘zlangan maqsadga erishgan: “Dnepropetrovskda Sovet ittifoqi davridan beri eng yirik va mashhur sanoat majmualaridan biri bo‘lgan, bugungi kunda raketa texnologiyalari va boshqa qurollar ishlab chiqaradigan Yujmash zavodi zarar ko‘rgan”.
“Shu paytdan boshlab, biz bir necha bor ta’kidlaganimizdek, avvalroq G‘arb tomonidan qo‘zg‘atilgan Ukrainadagi mintaqaviy mojaro global miqyosda tus oldi”, dedi Rossiya yetakchisi.
Putin o‘z bayonotida Rossiya raketalardan foydalanishdan oldin Ukraina fuqarolarini xavfli zonani tark etish haqida ogohlantirishini ta’kidladi.
“Rossiya tinch yo‘lni afzal ko‘radi, biroq voqealarning har qanday rivojiga ham tayyor, javob doimo tayyor”, deya qo‘shimcha qilgan u.
Ukraina prezidenti Vladimir Zelenskiy Rossiyaning harakatlarini eskalatsiyaning yangi qadami deb atadi va xalqaro hamjamiyatni “qattiq” munosabat bildirishga chaqirdi.
Qo‘shma Shtatlar va BMT ham “Oreshnik”ning ishga tushirilishidan xavotir bildirdi.
Izoh (0)