Latviya hukumati 16-iyuldan boshlab Belarusda ro‘yxatdan o‘tgan avtomobillarni mamlakatga kiritishni to‘xtatadi. Bu haqda Latviya Davlat daromad xizmatiga tayanib, Delfi xabar berdi.
Xabarga ko‘ra, Belarus davlat raqamlariga ega avtomobillarning Belarus-Latviya chegarasiga ham, Latviya va Rossiya o‘rtasidagi chegara o‘tish joylariga ham kirishi taqiqlanadi. Diplomatik va konsullik vakolatxonalari transport vositalari bundan mustasno.
Latviya chegarasini kesib o‘tmoqchi bo‘lgan Belarus davlat raqamlariga ega avtomobil egalari bojxonachilarning talablarini bajarishdan bosh tortsa, transport vositasini musodara qilish to‘g‘risida qaror qabul qilinishi mumkin, deya ta’kidlagan soliq xizmati.
Qaror Yevropa Ittifoqining Belarusga qarshi yangi sanksiyalar paketiga muvofiq kiritilmoqda. Ma’lum bo‘lishicha, Latviya Adliya vazirligi ham Belarusda ro‘yxatdan o‘tgan transport vositalarining mamlakatda bo‘lishini, jumladan, tranzit orqali chegarani kesib o‘tishni taqiqlovchi qonun loyihasini ishlab chiqmoqda. Belarus davlat raqamlariga ega bo‘lgan avtomobillar Latviyada qayta ro‘yxatdan o‘tkazilishi kerak. Qoidabuzarlarning mashinalari musodara qilinadi va Ukraina foydasiga o‘tkaziladi.
Shunga o‘xshash talablar allaqachon Latviyada Rossiya raqamlariga ega avtomobillar uchun amal qiladi. Rossiya avtomobillari tranzit mamlakat orqali faqat bir marta o‘tishi mumkin. Shuningdek, Litva, Estoniya, Finlyandiya va Polsha hududiga Rossiya davlat raqamlariga ega avtomobillarni kiritish taqiqlangan.
Izoh (0)