Yevroparlament raisi Roberta Metsola Rossiyaning Ukrainaga hujumlari kuchayib borayotgani fonida Germaniyaning TAURUS qanotli raketalarini Ukrainaga tez yetkazib berishga chaqirdi.
Funke guruhi nashrlariga bergan intervyusida Metsola YI davlatlari AQSH kabi uzoq masofali raketalarni Rossiyadagi nishonlarga qarshi qo‘llashga ruxsat berish tarafdori yoki yo‘qligi hamda Germaniya Ukrainaga TAURUS raketalarini yetkazib berishi kerakligi haqidagi savollarga ijobiy javob berdi.
“Ha, bu Yevroparlamentning pozitsiyasi, keling, bu Bundestagga saylovlardan keyin tegishli o‘zgarishlarga olib keladimi, ko‘ramiz”, dedi Metsola.
Uning ta’kidlashicha, bunday kurs o‘zgarishi, ehtimol, oldinroq sodir bo‘ladi, chunki “Berlin koalitsiyasida TAURUSni yetkazib berish bo‘yicha turli pozitsiyalar mavjud”.
Metsola ukrainalik askarlarga zudlik bilan yordam kerakligini ta’kidlagan.
“Ukrania prezidenti Vladimir Zelenskiy mamlakat G‘arbning qaysidir davlatida saylovlar o‘tkazilayotgani uchun harbiy yordamni cheksiz kuta olmasligini, Ukrainada esa har kuni urushda odamlar halok bo‘layotganini to‘g‘ri ta’kidladi”, deydi Metsola.
U “Rossiya urushni avj oldirayotgani, raketa hujumlarini kuchaytirayotgani, bu esa ko‘plab tinch aholining halok bo‘lishiga olib kelayotgani”dan xavotir bildirdi.
Putin 21-noyabr kuni Ukrainadagi obyektga ballistik raketa zarbasi berilganini tasdiqlagan edi.
Uning so‘zlariga ko‘ra, sinovlar muvaffaqiyatli o‘tgan, armiya ko‘zlangan maqsadga erishgan: “Dnepropetrovskda Sovet ittifoqi davridan beri eng yirik va mashhur sanoat majmualaridan biri bo‘lgan, bugungi kunda raketa texnologiyalari va boshqa qurollar ishlab chiqaradigan Yujmash zavodi zarar ko‘rgan”.
“Shu paytdan boshlab, biz bir necha bor ta’kidlaganimizdek, avvalroq G‘arb tomonidan qo‘zg‘atilgan Ukrainadagi mintaqaviy mojaro global miqyosda tus oldi”, dedi Rossiya yetakchisi.
Putin o‘z bayonotida Rossiya raketalardan foydalanishdan oldin Ukraina fuqarolarini xavfli zonani tark etish haqida ogohlantirishini ta’kidladi.
“Rossiya tinch yo‘lni afzal ko‘radi, biroq voqealarning har qanday rivojiga ham tayyor, javob doimo tayyor”, deya qo‘shimcha qilgan u.
Izoh (0)