Latviya politsiyasi transport vositalariga “Men rusman” stikerlari kabi “provokatsion yozuvlarni” yopishtirib yurishni nomaqbul amaliyot deb atadi.
Twitter (X) ijtimoiy tarmog‘iga joylangan Latviya davlat raqami va “Men rusman” yozuvi tushirilgan avtomobil suratiga politsiya shunday javob berdi.
Departamentning taʼkidlashicha, Ukrainadagi hozirgi geosiyosiy vaziyat va uzoq davom etayotgan urushni inobatga olgan holda, bunday stikerlar harbiy agressiyani madh etuvchi yoki Rossiya harbiy jinoyatlarini qo‘llab-quvvatlovchi sifatida qabul qilinishi mumkin.
Latviya politsiyasi, agar bunday stikerlar aniqlansa, avtomobil egalaridan ularni zudlik bilan olib tashlashni talab qilishini, shuningdek, yozuvlarni joylashtirish maqsadi va motivi haqida tushuntirish olishni va’da qildi. Harbiy agressiyani targ‘ib qilganlik uchun haydovchilar jarimaga tortilishi ham mumkin.
Latviyada Ukraina hududida rossiyalik harbiy xizmatchilar tomonidan sodir etilgan urush jinoyatlarini omma oldida oqlash va ulug‘lash uchun jinoiy javobgarlik nazarda tutilgan. Urush tarafdori belgilaridan ommaviy foydalanish, jumladan tegishli kontekstda Z va V belgilari — ma’muriy huquqbuzarlik sifatida jarima bilan jazolanadi.
2023-yil sentabr oyida Latviya, Litva, Polsha, Finlyandiya va Estoniya o‘z hududiga Rossiya raqamlariga ega avtomobillarning kirishini taqiqladi. Bu qaror Yevropa komissiyasining tushuntirishlari asosida qabul qilindi. Latviya Adliya vazirligi Rossiya va Belarus davlat raqamlariga ega avtomobillarni musodara qilish to‘g‘risidagi qonun loyihasini ham tayyorladi. Avtomobillar uch oy ichida mamlakatni tark etmasa yoki Latviya yurisdiktsiyasida qayta ro‘yxatdan o‘tkazilmasa, musodara qilinadi.
Izoh (0)