Finlyandiya parlamentining Konstitutsiyaviy qo‘mitasi majburiy chiqarib yuborish to‘g‘risidagi qonun loyihasini ma’qulladi. Qonun loyihasiga ko‘ra, Finlyandiya chegaralarida xalqaro himoyaga ariza berish vaqtincha taqiqlanadi, deb yozadi Helsingin Sanomat (HS) gazetasi.
Qonun loyihasini 15 qo‘mita a’zosi qo‘llab-quvvatladi, ikkitasi qarshi ovoz berdi, deb yozadi gazeta. Qo‘mita maslahatlashgan huquqshunoslar qonun loyihasini qo‘llab-quvvatlamadi. HS bilan suhbatlashgan ekspertlar hujjatning inson huquqlari bo‘yicha xalqaro shartnomalar, Yevropa Ittifoqi qonunlari va Finlyandiya konstitutsiyasiga muvofiqligidan xavotir bildirdi. Shuningdek, ushbu masalalarni parlament tartiblari doirasida hal etish qiyinligini ta'kidladilar.
Boshpana berish choralarini kuchaytiruvchi qonun loyihasiga ko‘ra, Rossiyadan kelgan qochqinlar boshpana so‘rovlari ko‘rib chiqilgunga qadar chegaradagi yoki yaqindagi maxsus markazlarda joylashtirilishini talab qiladi. Boshpana berish rad etilganlar deportatsiya qilinadi. Qonunga ko‘ra, hukumatning umumiy yig‘ilishi mamlakat suvereniteti va xavfsizligini ta’minlash maqsadida Finlyandiya chegarasining ayrim qismlarida xalqaro qo‘riqlash uchun arizalarni qabul qilishni cheklashi mumkin.
20-may kuni Finlyandiya bosh vaziri Petteri Orpo agar qonun qabul qilinsa, mamlakat Rossiya bilan chegarani qisman ochishi mumkinligini aytgandi. 25-may kuni Finlyandiya ichki ishlar vaziri Mari Rantanen yangi qonunga ko‘ra, Rossiya-Finlyandiya chegarasini yetarli asoslarsiz kesib o‘tgan shaxslar Rossiya ularni qabul qilishdan bosh tortgan taqdirda ham Rossiya hududiga qaytarilishini aytgan.
2022-yil 30-sentabrdan Finlyandiya Rossiya fuqarolarining turistik maqsadlarda kirishini chekladi, shuningdek, Finlyandiya orqali boshqa yevrozona mamlakatlariga sayyohlik tranzitini to‘xtatdi. Keyinchalik chegarada qochqinlar soni ortib borayotgani, ularning asosiy qismini Suriya, Iroq va Yamandan kelgan muhojirlar tashkil etganligi sababli chegaradagi barcha nazorat punktlari yopildi.
Izoh (0)