Ukrainaga harbiy yordam ko‘rsatish bo‘yicha aloqa guruhining Ramshtayndagi yig‘ilishida NATO davlatlari Kiyevga qanday qurollarni jo‘natishga tayyorligi haqida hisobot berdi. Asosiy e’tibor havo hujumidan mudofaa qurollariga, shuningdek harbiy xizmatchilarni tashish uchun mo‘ljallangan zirhli transport vositalari(bronemashina)ga qaratilmoqda. Birinchi marta Ukrainaga Buyuk Britaniya va Fransiyada ishlab chiqarilgan tanklar, shuningdek, AQSH armiyasining asosiy vositasi — Bradley bronemashinalari va’da qilindi. Yangi harbiy yordam paketidan joy olgan asosiy qurollar haqida “RBK” fotoreportaj tayyorladi.
Ukrainaning muhim infratuzilmasiga berilgan zarbalar fonida AQSH Kiyevga Ukraina uzoq vaqtdan beri so‘rayotgan Patriot havo mudofaasi tizimlarini va’da qildi. Patriot batareyasi elektr stansiyasi, radarlar, raketalarni boshqarish tizimi, uchirish moslamalari, antenna-machta konstruksiyasi va tutuvchi raketalardan (PAC-2 va PAC-3) iborat. AQSH Strategik va xalqaro tadqiqotlar markazi ma’lumotlariga ko‘ra, hozirda bitta batareyaning bahosi taxminan 1,1 milliard dollarni tashkil etadi.
Bundan tashqari, Ukraina Humwee yo‘ltanlamas mashinalariga o‘rnatilgan Avenger zenit-raketa komplekslarini, Britaniyaning Starstreak air defence havo mudofaa tizimlarini, shuningdek, Ukrainaga o‘tgan yili ham yuborilgan NASAMS (AQSH va Norvegiya hamkorligida ishlab chiqarilgan) havo mudofaa tizimlarini olishi kerak. Bu safar oltita NASAMS taqdim etilishi kutilmoqda.
Ukraina Qurolli kuchlarining muntazam ravishda zirhli transport vositalaridan ayrilayotgani G‘arb davlatlarini harbiylarni tashish uchun ko‘plab bronemashinalar yetkazib berishga majbur qilmoqda.
Kanada Ukrainaga o‘zi ishlab chiqargan 200 ta Senator’ni yuborishga va’da berdi. Mashina soatiga 110 km tezlikka chiqa oladi va unga pulemyot yoki avtomatik granatani ortish mumkin.
Bundan tashqari, Fransiyaning Bastion mashinalari Ukrainaga keltirilishi mumkin, Parij ilgari bu mashinalarni Afrikadagi mojaro zonalariga yuborgan. Shuningdek, avval Ukraina Qurolli kuchlari tomonidan turli yo‘nalishlarda foydalanilgan kichik tanklar — Shvetsiyaning Strf 90 va Amerikaning M-113 mashinalari Kiyevga yetkazib berilishi mumkin.
Buyuk Britaniya mudofaa vaziri Ben Uolles Ukrainaga Bulldog bronetransportyorlarini yuborishga va’da berdi. Ushbu mashina Iroq va Afg‘onistondagi qurolli mojarolar paytida ishlatilgan. Ishlab chiqaruvchilarning ta’kidlashicha, Isroilning Rafael zirhlari tufayli mashina qo‘lda otiladigan tankka qarshi granatalarga dosh bera oladi. Bulldog dvigateli Rolls-Royce tomonidan ishlab chiqarilgan.
AQSH, o‘z navbatida, Kiyevga 90 ta Stryker bronetransportyorlarini va’da qildi. Hozirgacha Ukrainada ushbu mashinaning Kanadada chiqarilgan variantlar mavjud edi. Stryker oilasining zirhli mashinalari Iroqda ishlatilgan, ammo boshqa mamlakatlar armiyalariga deyarli yetkazib berilmagan.
Germaniya Ukrainaga 40 ta Marder piyodalar uchun jangovar mashinasini yetkazib berishga rozi bo‘ldi. Bu asosan Bundesverning omborlarida saqlanayotgan mashinalar bo‘lib, ular yangi emas. Marder uzoq vaqtdan beri o‘zining yaxshi himoyasi bilan tanilgan, ammo shiddatli jangovar harakatlar sharoitida bu mashinadan kamdan-kam foydalanilgan. Avval Marder’larning bir qismi Afg‘onistondagi nemis kontingentiga yuborilgandi.
Britaniya va Ummon armiyalarining asosiy jangovar tanki bo‘lgan Challenger 2 juda harakatchan va avvalo bevosita o‘t ochish zonalarida foydalanish uchun mo‘ljallangan. Tanklarni ishlab chiqaruvchi Rheinmetall BAE Systems Land ma’lumotlariga ko‘ra, ular keng miqyosdagi yuqori intensiv to‘qnashuvlarda ham harakatlana oladi. U 120 millimetrli L30 soyli tank zambaragi bilan jihozlangan. Ushbu turdagi tanklar Britaniya armiyasi tomonidan Bosniya, Kosovo va Iroqda ishlatilgan.
Britaniya hukumati Kiyega 14 ta tank yetkazib bermoqchiligi haqida e’lon qildi, agar bu amalga oshsa, 1990-yillarning oxirida yaratilgan ushbu tanklar Ukraina ixtiyoridagi birinchi zamonaviy G‘arb tanklariga aylanadi.
Daniya Fransiyaning Nexter kompaniyasiga o‘z armiyasi uchun buyurtma bergan 19 ta Caesar o‘ziyurar artilleriya qurilmalarini Ukrainaga topshirishga qaror qildi. Daniya hozirgacha nechta qurilmani olgani va Ukraina armiyasiga qachon yetkazib berishi haqida ma’lumot berilmagan, ammo bu Daniya armiyasida yangi brigada yaratishni sekinlashtirishi aniq.
Ishlab chiqaruvchi kompaniyaning ma’lumotlariga ko‘ra, 155 mm kalibrli Caesar 2009-yildan beri dunyoning ko‘plab armiyalarida faol ishlatilgan hamda Afg‘oniston, Livan va Malida o‘z kuchini isbotlagan.
Ukrainada ham avvalroq Fransiyadan olingan Caesar’lar faol ishlatilmoqda.
Qo‘shma Shtatlar Ukrainaga Bradley piyodalar uchun mo‘ljallangan jangovar mashinalarini yetkazib berishni va’da qildi. Bu Amerika armiyasidagi asosiy mashina. Ikkinchi jahon urushi qo‘mondoni Omar Bredli nomi bilan atalgan Bradley 25 millimetrli zambarak, pulemyot va tankka qarshi raketa tizimi bilan jihozlangan.
NATO davlatlari va’da qilgan boshqa qurollar qatorida Boltiqbo‘yi va Sharqiy Yevropa davlatlari Ukrainaga sovet qurollarining so‘nggi zaxiralarini, jumladan gaubitsalar, Mi-8 vertolyotlari va T-72 tanklarini yuborishga kelishib oldi. Shuningdek, harbiy yordam paketlaridan urush zonasida ishlatilayotgan artilleriya qurilmalari va havo mudofaa tizimlari uchun snaryadlar joy olgan.
Izoh (0)