Finlyandiya prezidenti Sauli Niinistyo o‘zining yangi yil murojaatida Rossiya prezidenti Vladimir Putinni Stalinga qiyosladi. Uning murojaati prezident saytida e’lon qilindi.
Niinistyo 2022-yil mamlakatni o‘tmishga qaytargani, Yevropaga esa buyuk urush dahshatlari qaytganini aytdi. Uning fikricha, Finlyandiyaning tashqi va xavfsizlik siyosati hozirda tarixiy burilish nuqtasini boshdan kechirmoqda.
“Agar Rossiya keng masshtabdagi tahdid Ukrainani tezda tiz cho‘ktirishiga ishongan bo‘lsa, jiddiy xatoga yo‘l qo‘ydi. Sovet Ittifoqi ikki hafta ichida Xelsinkiga yetib borishini taxmin qilgan qishki urush bilan Ukrainadagi vaziyatning o‘xshashligi haqida o‘ylamaslik mumkin emas.
Avtoritar davlat rahbarlari sifatida Stalin va Putin asosiy omilni aniqlay olmadi. Gap shundaki, ozod yurtda yashayotgan odamlarning o‘z irodasi, e’tiqodi bor. Hamjihatlikda ishlayotgan xalq juda katta kuch hisoblanadi”, — dedi u.
Finlyandiya rahbari Rossiyaning ikkinchi xatosi G‘arbning Ukraina xalqiga rahm-shafqati o‘tib ketadi degan fikri ekanini ta’kidladi.
Avvalroq NATO bosh kotibi Yens Stoltenberg Madridda bo‘lib o‘tayotgan Parlament assambleyasida Rossiya prezidenti Vladimir Putin yo‘l qo‘ygan ikkita strategik xatoni aytgandi.
Stoltenbergning fikricha, Putin Ukraina xalqining jasorati va Shimoliy Atlantika alyansi birligini past baholab, strategik xatoga yo‘l qo‘ygan. NATO bosh kotibi uzoq urishga tayyor bo‘lish kerakligi haqida ogohlantirgan. U Rossiya prezidenti harbiy amaliyotda muvaffaqiyatsizlikka uchraganiga qaramay, Rossiyaning harbiy qudratini past baholash xato hisoblanishini qo‘shimcha qilgan.
Izoh (0)