Rossiya hukumati NATO rahbariyatiga murojaat yuborib, uning chegaralari yaqinida alyans qurolli kuchlari joylashtirilayotganiga qatʼiy eʼtiroz bildirdi. Bu haqda Rossiya Tashqi ishlar vazirligi tarqatgan maʼlumotga asoslanib, “TASS” nashri xabar berdi.
Manbada aytilishicha, Rossiyaga qo‘shni Finlyandiyada NATO harbiy kontingentini joylashtirish boshlangan. Ko‘plab harbiy obyektlar alyans boshqaruviga berilgan.
Rossiya rasmiylari Xelsinkining qurollanishi Moskva uchun tahdid ekanligini bildirgan. Rossiya NATO ittifoqchilarining agressiv qarorlariga qarshi turish uchun barcha zarur choralarni, jumladan, harbiy-texnikaviy vositalarni qo‘llashi xabar qilingan.
Rossiya Tashqi ishlar vazirligi matbuot kotibi o‘rinbosari Andrey Nastasin Rossiyaning har qanday tashqi xavfga nisbatan javob reaksiyasi shubhasiz va qatʼiy bo‘lishini bildirgan. Kuch vositasida Moskvani yon berishga majburlashdan foyda yo‘q ekanini taʼkidlagan.
“Biz bu mavzuni bir necha bor muhokama qildik, shu jumladan, brifinglarda ham ushbu masala bo‘yicha izoh berdik. Faqat shuni tasdiqlashim mumkinki, Rossiya NATOning chegaramiz bo‘ylab harbiy kuchlar joylashtirishini javobsiz qoldirmaydi. Bu Rossiya Federatsiyasi xavfsizligiga to‘g‘ridan to‘g‘ri tahdiddir”, — degan Nastasin.
Avvalroq Finlyandiya parlamenti AQSH bilan mudofaa sohasida hamkorlik qilish to‘g‘risida bitim imzolagan edi. Kelishuvga ko‘ra, Finlyandiya o‘zining 15 ta harbiy obyektini AQSH kuchlari foydalanishi uchun topshirishi kerak bo‘lgan. Shuningdek, Finlyandiya harbiy arsenali AQSH qurollari bilan almashtirilishi rejalashtirilgan.
Izoh (0)