Henley & Partners xalqaro konsalting kompaniyasi tomonidan tuzilgan dunyoning eng kuchli pasportlari reytingida O‘zbekiston 79-o‘rinni egalladi.
Xalqaro konsalting kompaniyaning ma’lumotlariga ko‘ra, O‘zbekistonda fuqarolik pasportiga ega bo‘lganlar 64 ta davlatga vizasiz yoki soddalashtirilgan tartibda kirish imkoniga ega. 2023-yilda O‘zbekiston ushbu reytingda 78-o‘rinni band qilgan edi. Shu yilning boshidagi ma’lumotlarga ko‘ra esa 80-o‘rinda bo‘lgan.
O‘zbekistondan tashqari Kuba, Mongoliya va Mozambik kabi mamlakatlar 79-o‘rinda qayd etilgan.
Reytingda birinchi o‘rinni Singapur pasporti egallagan bo‘lib, ushbu mamlakat fuqarolari 195 ta mamlakatga vizasiz kirish imkoniyatiga ega. Reytingda ikkinchi o‘rinni esa Fransiya, Germaniya, Italiya, Yaponiya va Ispaniya (194 ta davlatga vizasiz kirish) band qilgan. Avstriya, Finlyandiya, Islandiya, Lyuksemburg, Nederlandiya, Janubiy Koreya va Shvetsiya esa 193 ta davlatga vizasiz kirish imkoniyati bilan reytingning uchinchi o‘rnini egallagan.
Shuningdek, Ukraina 32-o‘rin (149 ta davlat), Rossiya 50-o‘rin (120 davlat), Turkiya 51-o‘rinni (118 davlat) qayd etgan.
Markaziy Osiyo davlatlarining pasport reytingidagi o‘rni quyidagicha:
- Qozog‘iston 67-o‘rin (79 ta davlat);
- Qirg‘iziston 78-o‘rin (65 ta davlat);
- O‘zbekiston 79-o‘rin (64 ta davlat);
- Tojikiston 82-o‘rin (60 ta davlat);
- Turkmaniston 90-o‘rin (52 ta davlat);
- Afg‘onistin so‘nggi 107-o‘rin (28 ta davlat).
Ma’lumot uchun, joriy yilning fevral oyida O‘zbekiston Tashqi ishlar vazirligi matbuot kotibi Ahror Burxanov o‘z Telegram kanalida, O‘zbekiston fuqarolari vizasiz kirishi mumkin bo‘lgan davlatlar ro‘yxatini eʼlon qilgan edi. Xususan, unda o‘zbekistonliklar 30 mamlakatga vizasiz, 29 ta davlatga kirib kelganidan keyin, 15 ta mamlakatga esa elektron viza orqali kirishlari mumkinligi qayd etilgan.
Izoh (0)