Rossiya Yadroviy xavfni kamaytirish milliy markazi orqali “Oreshnik”ning ishga tushirilishi haqida AQSHni avtomatik ravishda ogohlantirdi. Bu haqda Rossiya prezidentining matbuot kotibi Dmitriy Peskov ma’lum qildi.
Rossiya amerikaliklarni avtomatik ravishda ishlaydigan va AQSHdagi shunga o‘xshash tizim bilan doimiy aloqada bo‘lgan Rossiya Yadroviy xavfni kamaytirish milliy markazi orqali “Oreshnik” ishga tushirilishi haqida ogohlantirdi, dedi Peskov.
Uning qayd etishicha, “ogohlantirish avtomatik rejimda ishga tushirilishidan 30 daqiqa oldin yuborilgan”.
Kreml vakiliga ko‘ra, Rossiya “Oreshnik” uchirilishi haqida Amerika tomonini kelishuvlarga hamda “qit’alararo ballistik raketalarni uchirish to‘g‘risida xabardor qilish rejimi”ga muvofiq xabardor qilmagan, chunki “Oreshnik” qit’alararo strategik raketa emas.
Bu o‘rta masofaga mo‘ljallangan qurol, deya qo‘shimcha qilgan siyosatchi.
Putin AQSHning O‘rta va uzoq masofalarga mo‘ljallangan yadroviy kuchlar shartnomasini bir tomonlama yo‘q qilish qarorini xato deb atadi. U, shuningdek, Rossiya o‘z qurollarini Rossiya nishonlariga qarshi ishlatadigan mamlakatlarning harbiy nishonlariga qarshi qurol ishlatish huquqiga ega ekanligini ta’kidladi.
Putin 21-noyabr kuni Ukrainadagi obyektga ballistik raketa zarbasi berilganini tasdiqlagan edi.
Uning so‘zlariga ko‘ra, sinovlar muvaffaqiyatli o‘tgan, armiya ko‘zlangan maqsadga erishgan: “Dnepropetrovskda Sovet ittifoqi davridan beri eng yirik va mashhur sanoat majmualaridan biri bo‘lgan, bugungi kunda raketa texnologiyalari va boshqa qurollar ishlab chiqaradigan Yujmash zavodi zarar ko‘rgan”.
“Shu paytdan boshlab, biz bir necha bor ta’kidlaganimizdek, avvalroq G‘arb tomonidan qo‘zg‘atilgan Ukrainadagi mintaqaviy mojaro global miqyosda tus oldi”, dedi Rossiya yetakchisi.
Putin o‘z bayonotida Rossiya raketalardan foydalanishdan oldin Ukraina fuqarolarini xavfli zonani tark etish haqida ogohlantirishini ta’kidladi.
“Rossiya tinch yo‘lni afzal ko‘radi, biroq voqealarning har qanday rivojiga ham tayyor, javob doimo tayyor”, deya qo‘shimcha qilgan u.
Izoh (0)