Rossiya Xavfsizlik kengashi raisi o‘rinbosari Dmitriy Medvedev Al Arabiya telekanaliga bergan intervyusida AQSHning saylangan prezidenti Donald Tramp Ukraina mojarosini hal qilishga erisha olishini, biroq Rossiya faqat o‘ziga ishonishi aytib o‘tdi.
“Biz saylangan prezident Tramp pragmatik shaxs ekanligini yaxshi bilamiz. U mazkur mojaroga imkon qadar tezroq barham berishini omma oldida aytib, va’da bergan. Tramp bu ishni amalga oshira oladi, chunki barcha yechimlar Vashingtonda bor", dedi Medvedev.
Shu bilan birga, u Moskva o‘z umidini Trampga ham, boshqalarga ham bog‘lamasligini ta’kidladi: “Biz faqat o‘z kuchimizga tayanamiz, mudofaa salohiyatimiz nuqtayi nazaridan o‘zimizga ishonamiz. Ushbu mojarodagi shubhasiz g'alaba qozonishimizga ishonchimiz komil", dedi Medvedev.
Tramp 5-noyabr kuni bo‘lib o‘tgan AQSh prezidentlik saylovlarida demokratlar vakili Kamala Harris ustidan g‘alaba qozondi. Uning inauguratsiyasi 2025-yil 20-yanvarda bo‘lib o‘tadi. Tramp Ukrainadagi mojaroni imkon qadar tezroq to‘xtatish niyatida ekanini bir necha bor ta’kidlagan.
Avvalroq Reuters beshta manbaga tayanib Rossiya prezidenti Vladimir Putin Donald Tramp bilan Ukrainada o‘t ochishni to‘xtatish kelishuvini muhokama qilishga tayyorligini yozgandi.
Agentlikning aniqlik kiritishicha, Putin har qanday sezilarli hududiy imtiyozlar ehtimolini istisno qiladi. Shuningdek, Rossiya Ukrainaning NATOga kirishiga hamda Ukraina hududida NATO qo‘shinlarining bo‘lishiga ham rozi bo‘lmaydi.
Reuters’ning besh nafar sobiq va amaldagi rossiyalik amaldorlarga tayanib xabar berishicha, Kreml front chizig‘idagi mojaroni muzlatishga rozi bo‘lish ehtimoli mavjud. Muzokaralar to‘rtta viloyatning, xususan, DXR, LXR, Zaporojye va Xerson viloyatlari yangi chegaralarini aniq belgilash bo‘yicha olib borilishi mumkin.
Nashr manbalari Rossiya Xarkov va Nikolayev viloyatlaridagi kichik hududlardan voz kechishi mumkinligini qayd etgan.
Izoh (0)