Bundesver (Germaniya Qurolli kuchlari) Rossiya bilan harbiy to‘qnashuv yuz bergan taqdirda amalga oshiriladigan maxsus reja tayyorladi.
Bu haqda Frankfurter Allgemeine Zeitung gazetasi ma’lum qildi.
1000 sahifadan iborat rejada alohida himoyaga loyiq barcha infratuzilma ro‘yxati keltirilgan. Shuningdek, reja Rossiyani NATOning sharqiy qanotida ushlab turish uchun zarur bo‘lgan harakatlar yig‘indisini o‘z ichiga oladi.
Rejada ta'kidlanishicha, bu holda Germaniya harbiy texnika, oziq-ovqat va dori-darmonlar zaxirasi jamlanadigan, “o‘n minglab, ehtimol, yuz minglab qo‘shinlar yuboriladigan markaz”ga aylanadi.
Iyul oyida Bild gazetasi Bundesver NATO qo‘shinlarini alyansning sharqiy jabhasiga o‘tkazish zarur bo‘lgan taqdirda harbiy va fuqarolik hokimiyat organlarining harakat yo‘nalishini belgilab beruvchi maxfiy rejani ishlab chiqqani haqida xabar bergan edi.
“Uchinchi jahon urushi boshlandi”
Avvalroq Ukraina armiyasining sobiq bosh qo‘mondoni Valeriy Zalujniy uchinchi jahon urushi rasman boshlanganini aytgandi.
U 2024-yilda Ukraina qarshisida endi Rossiya emas, boshqa davlat turganini ma’lum qildi.
"Ukraina qarshisida Shimoliy Koreya askarlari turibdi. Keling, ochig‘ini aytaylik. Allaqachon Eron Shahed’lari tinch aholini ochiqchasiga, hech narsadan uyalmasdan o‘ldirmoqda. Ukrainaga allaqachon aynan Shimoliy Koreyada ishlab chiqarilgan raketalar uchib kelmoqda va ular buni ochiq-oydin e’tirof etmoqda", dedi sobiq qo‘mondon.
Urushda keskinlik oshdi
19-noyabr kuni Ukraina armiyasi Rossiya hududiga AQSHning uzoq masofaga uchuvchi ATACMS raketalari bilan zarba berdi. Hujum Bryansk viloyati Karachev shahridagi harbiy obyektga qaratildi.
Bunga javoban 21-noyabr kuni Rossiya ilk bor Ukrainaning Dnepr shahri bo‘ylab qit’alararo ballistik raketa uchirdi. Hujum Astraxan viloyatidagi poligondan amalga oshirilgan.
18-noyabr kuni AQSH prezidenti Jo Bayden Ukrainaga ATACMS raketalari bilan Rossiya hududiga zarba yo‘llashga ruxsat bergandi.
Izoh (0)