“Bilayn Qozog‘iston” kompaniyasi 5-oktabrdan respublikada o‘zining “TV Internet Doma” platformasida va BeeTV servisida ba’zi Rossiya telekanallari translyatsiyasini to‘xtatadi. Bu haqda operator saytidagi xabarda aytiladi.
“Rossiya 24”, “Perviy kanal SNG”, “Dom kino”, “Pobeda”, “O!” va boshqa bir qator kanallar uzatilishdan to‘xtaydi.
Buning evaziga, operator mijozlarni qo‘shimcha to‘lovsiz “kengaytirilgan TV-paketlarga o‘tkazishga va’da berdi.
“Bilayn” Qozog‘istonda eng yirik televizion xizmatlar ko‘rsatuvchilaridan biridir.
Ba’zi Telegram-kanallar xabarlariga ko‘ra, yaqin kelajakda boshqa operatorlar ham Rossiya televizion kontentidan voz kechishi kutilmoqda. Buning sababi ochiqlangani yo‘q.
Qaysi davlatlar Rossiya telekanallari efirini to‘xtatdi?
Rossiyaning Ukrainadagi harbiy harakatlari oqibatida bir qator davlatlar Rossiya telekanallari efirini to‘xtatdi va Rossiya OAVlarini bloklashni boshladi. Xususan, RT (Russia Today) kanali namoyishini Polsha, Finlyandiya va Avstraliya taqiqladi. Latviyada esa bir qancha Rossiya telekanallari translyatsiyasi to‘xtatildi. Moldova Sputnik axborot agentligi saytini blokladi.
YouTube esa Ukraina tomoni murojaatiga ko‘ra, Ukrainada “Perviy kanal”, “Zvezda”, TNT va boshqa telekanallar namoyishini blokladi. Bundan tashqari, Yevropada RT va Sputnik sahifalari ham bloklandi.
Litvada 25-fevral kuni “NTV Mir”, “RTR Planeta”, “Rossiya 24”, shuningdek, “Belarus 24” telekanallarini 5 yil muddatga, “RBK” va TVCI efirini esa 3 yil muddatga taqiqlash bo‘yicha qaror qabul qilindi.
Ushbu sanadan Estoniyada ham Rossiyaning beshta telekanali: “RTR Planeta”, “NTV Mir”, “NTV Mir Baltiya”, “Rossiya 24” va TVCI, shuningdek, “Belarus 24”ni retranslyatsiyasiga qo‘yilgan taqiq kuchga kirdi.
Italiyaning efirga uzatuvchi Sky Italia kompaniyasi (egasi News Corp.) “Rossiya 24”, “RTR Planeta”, “Perviy kanal” va RT’ni avtomatik efir setkasidan chiqarib yubordi.
Qozog‘istonning Qarag‘anda viloyati hududiy telekommunikatsiya kompaniyasi hisoblanmish “Remstroyservis” Rossiya federal telekanallari efirini o‘chirib qo‘ydi.
Ukrainaning Toshkentdagi elchixonasi 1-mart kuni O‘zbekiston Tashqi ishlar vazirligiga mamlakatda Rossiya telekanallari efirini to‘xtatishni so‘rab, nota yuborgandi.
May oyida Qirg‘iziston va Turkmanistonda sanksiyalar tufayli Rossiya telekanallari translyatsiyasi to‘xtatilgan edi. Uzatish to‘xtatib qo‘yilishi sababi sifatida “qator mamlakatlarda umumrossiya telekanallari tarqatilishi bo‘yicha qonuniy cheklovlar” qabul qilinishi tufayli ularni uzatish “xalqaro sun’iy yo‘ldoshlarda bir tomonlama tartibda bloklab qo‘yilgani” aytilgandi.
VGTRK (Umumrossiya davlat televizion va radiouzatuv kompaniyasi)ga qarshi sanksiyalarni may oyi boshida Buyuk Britaniya e’lon qilgan edi. Nafaqat davlat mediaxoldingining o‘zi, balki jurnalistlar ham cheklovlarga uchradi. Shundan keyin Rossiya TIV Britaniya elchisini chaqirib, norozilik bildirdi va javob choralari ko‘rishga va’da berdi.
Urush boshlanganidan keyin, shuningdek, Yevroittifoq, Avstraliya va boshqa mamlakatlar ham ularga qarshi sanksiyalar kiritdi. AQSHda Birinchi kanal, “Rossiya-1” va NTV sanksiyaga uchradi. Sanksiyalar tufayli sun’iy yo‘ldoshlar egalari bir tomonlama tartibda ushbu telekanallar uzatilishini o‘chirib qo‘ya boshladi.
Izoh (0)