Shvetsiya hukumati 2025 va 2026-yillarda Ukrainaga harbiy yordam uchun 25 milliard kron (2,25 milliard dollar) ajratishga qaror qildi.
Bu haqda Shvetsiya mudofaa vaziri Pol Jonson ukrainalik hamkasbi Rustem Umerov bilan muzokaralar yakunlari bo‘yicha o‘tkazilgan matbuot anjumanida ma’lum qildi.
Uning so‘zlariga ko‘ra, Vazirlar Mahkamasi Ukraina harbiy-sanoat kompleksiga uzoq masofaga uchuvchi raketalar va dronlarni ommaviy ishlab chiqarish uchun mablag‘ ajratishga tayyor.
Jonson, shuningdek, yangi paket tafsilotlari yanvar oyida e’lon qilinishini ta’kidladi.
Avvalroq Britaniyaning Times nashri Ukraina qurolli kuchlarida bor-yo‘g‘i 50 ta ATACMS taktik raketalari mavjud, deb yozgandi.
“Pentagon hech qanday ma’lumot bermagan bo‘lsa-da, Kiyev hukumatida hozirda bor-yo‘g‘i 50 ta raketa borligi taxmin qilinmoqda. Ukrainada ularni uchirish uchun HIMARS va MLRS raketa tashuvchi qurilmalari yetarli darajada”, deya ta’kidlagan nashr.
ATACMS — uzoq masofaga zarba beruvchi boshqariladigan raketa bo‘lib, u qo‘mondonlarga jangovar maydonni shakllantirish uchun zudlik bilan o‘t ochish imkonini beradi. Maksimal uchish masofasi 300 kilometrni tashkil qiladi. ATACMS 1980-yillarda ishlab chiqilgan va birinchi marta 1991-yilda Fors ko‘rfazi urushi paytida ishlatilgan. O‘shandan beri u turli qurolli mojarolarda, jumladan, Iroq urushi va Rossiya—Ukraina urushida faol ishlatilgan.
Izoh (0)