Bugungi ro‘yxatda yangi va trenddagi filmlarni topmasligingiz mumkin, lekin mazkur filmlarning har biri sizni qayta va qayta tomosha qilishga ilhomlantiradi, kuzning salqin kunlarida o‘ziga xos kayfiyat bag‘ishlaydi.
“Lyupen” (2021-2023)
Serial fransuz yozuvchisi Moris Leblanning “Arsen Lyupen” asaridan ilhomlanib yaratilgan. Serial otasiga qarshi adolatsiz ayblovlar uchun Pellegrin oilasidan qasos olishga harakat qilgan Assan Diop haqida hikoya qiladi. Serialda bosh qahramonni “1+1” filmidagi Driss roli bilan tanilgan Omar Si ijro etgan.
“O‘lim quroli: suyaklar shahri” (2013)
Klari Frayning onasi g‘oyib bo‘lgach, u yer yuzini turli yovuz kuchlardan himoya qiladigan jangchilardan ekanini bilib qoladi. So‘ng Klari o‘xshash iqtidorli insonlar bilan birlashadi va “Soyalar dunyosi” deb nomlangan Nyu York shahrining boshqa dunyodagi aksiga sayohat qiladi.
“Vaqt sayohatchisining rafiqasi” (2022)
Genri — g‘ayrioddiy kuchga ega odam. Unda beixtiyor vaqtlar aro turli joylarga sayohat qilish imkonini beruvchi gen bor. Uning rafiqasi Kler turmush o‘rtog‘ining bunday qobiliyati bilan yashashga juda qiynaladi.
“Sietldagi uyqusiz tun ”(1993)
Yarim tunda radio orqali dadasiga turmush o‘rtoq qidirayotgan yosh bolaning maktubi o‘qib eshittiriladi. Mamlakatning turli burchaklaridan yuzlab ayollar bunga javob beradi, ammo ulardan faqat bittasi bolaning otasi va u bir-birlari uchun yaratilganini tushunadi. Ularning orasida yuzlab kilometr masofa bo‘lishi va bolaning otasi bundan xabarsiz ekanligiga qaramay, bosh qahramon o‘z maqsadiga yetish uchun olg‘a qadam bosadi.
“Muqaddima” (2010)
Ilmiy-fantastik janrdagi mazkur filmda Kobb (Leonardo Di Kaprio) o‘zining jamoasi bilan tushlar orqali intellektual mulkni o‘g‘irlash yoki o‘zgartirish bilan shug‘ullanadi. U nafaqaga chiqib, uyiga bolalarining oldiga qaytishni orzu qiladi, lekin buning uchun juda qiyin vazifani bajarish sharti qo‘yiladi. U bosh direktorning ongiga o‘g‘irlangan g‘oyani qayta kiritishi kerak bo‘ladi.
“Uch kunda turmushga chiqish” (2009)
Anna 29-fevral kuni qallig‘i Jeremiga turmush qurishni taklif qilish uchun Dublinga borishni rejalashtiradi, chunki Irlandiya an’analariga ko‘ra, o‘sha kuni turmush qurish taklifini olgan erkak albatta rozi bo‘lishi kerak.
“Lemoni Sniket: 33 baxtsizlik” (2017-2019)
Bred Silberlingning ertak-filmida yetim qolgan Bodlerlarning og‘ir taqdiri haqida hikoya qilinadi. Zukko Vayolet, aqlli Klaus va chaqaloq ota-onasidan sirli yong‘in tufayli ayrilganidan so‘ng, bolalarni graf Olaf o‘z qaramog‘iga oladi.
Izoh (0)