O‘zbekistonlik san’atkorlar Rossiya prezidenti Vladimir Putin farmoni asosida “Do‘stlik” ordeni bilan taqdirlandi.
18-noyabr kuni imzolangan farmonda qayd etilishicha, “Yalla” ansablining badiiy rahbari Farrux Zokirov va “O'zbekkonsert” davlat muassasasi xonandasi Sevara Nazarxon o‘zbek va rus madaniyatlarini yaqinlashtirish va boyitishga qo‘shgan hissasi uchun mukofotlangan.
O‘zbekiston prezidenti farmoni bilan Rossiyaning ikki artisti — Rossiya xalq artisti, Moskva drama teatri badiiy rahbari, teatr va kino aktyori Sergey Bezrukov va Rossiya xalq artisti, balet artisti, rejissyor Andris Liyepa “Do‘stlik” ordeni bilan mukofotlandi.
Farmonda qayd etilishicha, ular O‘zbekiston va Rossiya o‘rtasidagi keng qamrovli strategik sheriklik, ittifoqchilik munosabatlarini rivojlantirish, xalqlarning an’anaviy do‘stlik va hamjihatlik aloqalarini mustahkamlash borasidagi katta xizmatlari, o‘zining yorqin va betakror iste’dodi, xususan, kino va teatr yo‘nalishidagi sermahsul ijodiy faoliyati bilan madaniyat va san’at sohalarida hamkorlikni kengaytirish, ma’naviy qadriyatlarni asrab-avaylash va boyitishga qo‘shayotgan munosib hissasi uchun taqdirlandi.
Izoh (0)