Xonanda va aktrisa Ledi Gaga Netflix’ning olamshumul mashhurlikka erishgan “Uenzdey” serialining ikkinchi mavsumida ishtirok etadi. Bu haqda Europa Plus xabar bermoqda. Suratga olish ishlari allaqachon Yevropada boshlab yuborilgan, deb yozadi Entertainment Weekly.
O‘tgan yili innetrvyulardan birida “Uenzdey” seriali bosh roli ijrochisi Jenna Ortega shouning ikkinchi mavsumida Ledi Gagani ko‘rishdan juda mamnun bo‘lishini aytgan edi. Aktrisaning so‘zlariga ko‘ra, xonandaga yangi maktab direktori roli berilishi mumkin.
“Ishonchim komilki, Netflix’ga bu g‘oya yoqadi”, dedi yosh aktrisa.
“Bilasizmi, bir vaqtlar men Ledi Gaga bilan ishlagan sartarosh bilan hamkorlik qilganman va men uni bir necha yil oldin konsertda ko‘rganman. Sartarosh Ledi Gagadan men uchun videomurojaat yozib berishni iltimos qilgan edi. Menimcha, xonanda buni eslay olmaydi. Ammo uni hozir kuzatar ekanman, hayotdagi barcha narsa juda tez sur’atda o‘zgarib borishini tushunyapman”, dedi Jenna Ortega.
Hozircha Ledi Gaga qaysi obrazda namoyon bo‘lishi haqida tafsilotlar oshkor etilmagan. Dastlab serial ijodkorlari xonandani bosh rolga taklif qilmoqchi edi, ammo Ledi Gaga o‘ta bandligi sabab kichik rolni ijro etishni ma’qul ko‘rgan. Buning ustiga, yulduz 2025-yilning fevral oyida chiqishi rejalashtirilgan yettinchi albomi ustida ishlamoqda.
2011-yilda Gaganing “Born This Way” albomidagi “Bloody Mary” qo‘shig‘i mashhur bo‘lib ketganidan so‘ng ko‘plab muxlislar qo‘shiqchini yangi mavsumda chiqishini kutishgan edi.
Eslatib o‘tamiz, Ledi Gaga kino sohasida ko‘plab teleseriallar va filmlarda ishtirok etgan. Jumladan, oktyabr oyida “Joker: ikki kishilik telbalik” filmining premyerasi bo‘lib o‘tdi, unda Gaga Harli Kvin obrazini gavdalantirgan.
2022-yil noyabr oyining oxirida Netflix’ning “Uenzdey” seriali ekranlarga chiqdi. Serialda bosh rolni ijro etgan aktrisa Jenna Ortega “Oltin globus”da o‘zining rasmiy debyutini o‘tkazdi, shu bilan birga, birinchi “Eng yaxshi rol” nominatsiyasini oldi. Loyiha qisqa vaqt ichida mashhurlikka erishdi va tomoshabinlarning qalbidan joy oldi. “Addams oilasi” haqidagi spin-off 2022-yilning eng ko‘p tomosha qilingan serialiga aylandi.
Izoh (0)