London Brand Finance konsalting kompaniyasi tomonidan tuzilgan jahon shahar brendlari reytingida yetakchilikni saqlab qoldi. Britaniya poytaxti 100 baldan 90,9 ball oldi.
“London o‘zining kuchli xalqaro ishtiroki, madaniy o‘ziga xosligi va taniqli ta’lim muassasalari tufayli dunyoning eng yaxshi shahar brendi sifatida porlashda davom etmoqda”, dedi Brand Finance bosh direktori va boshqaruv raisi Devid Heyg.
Kuchli uchlikning qolganlari ham o‘zgarishsiz qoldi. Ikkinchi o‘rin 89,8 ball bilan Nyu York shahriga, uchinchi o‘rin 87,8 ball bilan Parijga nasib etdi.
Bu safar Los Anjeles va Sidney o‘rniga kuchli beshlikni Tokio va Dubay yakunladi.
Reyting tuzuvchilari, shuningdek, “Madaniyat va meros” kichik turkumidagi Yevropa shaharlarining jozibasini ta’kidlab o‘tishdi. Eng yaxshi 20 ta o‘rindan 17 tasini Yevropa shaharlari, shu jumladan, eng yaxshi 5 ta joyni Parij, Rim, London, Vena va Milan egalladi.
Reyting 20 ta davlatdan 15 mingdan ortiq kishi o‘rtasida o‘tkazilgan so‘rov asosida tuzilgan.
Izoh (0)