Londonning eng mashhur ko‘chalaridan biri, Vestminsterdagi Oksford ko‘chasi 1,1 km uzunlikdagi tirbandlikdan butunlay ozod qilinadi va piyodalar hududiga aylanadi.
Reja London meri Sodiq Xon tomonidan taqdim etilgan va poytaxtni piyodalarga qulay shaharga aylantirish rejasi hukmron Leyboristlar partiyasi tomonidan qo‘llab-quvvatlanayotgani sababli tasdiqlanishi kutilmoqda. Bu haqda BBC xabar berdi.
Meriya maʼlumotlariga ko‘ra, Oksford ko‘chasini piyodalar ko‘chasiga aylantirish tarixiy muhitni tiklanishiga hissa qo‘shadi. Loyihaning qiymati 150 million funt sterlingga baholanmoqda.
“Oksford ko‘chasi Britaniya chakana savdosining gultoji bo‘lgan, ammo so‘nggi o‘n yil ichida u katta zarar ko‘rganiga shubha yo‘q”, dedi Sodiq Xon.
Oksford ko‘chasi 12-asrda paydo bo‘lgan va hozirgi nomini 1729-yilda olgan. Hozir bu Yevropadagi eng gavjum savdo ko‘chasi. Uning umumiy uzunligi 2,4 km. Unda 300 ga yaqin do‘kon mavjud bo‘lib, ulardan 90 ga yaqini jahonga mashhur brendlardir.
Oksford-stritga har kuni 500 mingga yaqin odam tashrif buyuradi. Cushman & Wakefield xalqaro ko‘chmas mulk agentligi maʼlumotlariga ko‘ra, ko‘cha 2023-yil oxiriga kelib Yevropadagi eng qimmat ko‘chalar ro‘yxatida 18-o‘rinni egalladi.
Merning hozirgi tashabbusi shahar hokimiyatining Oksford ko‘chasini piyodalar ko‘chasiga aylantirishga qaratilgan birinchi urinishi emas. 2017-yilda taklif qilingan reja jamoat transporti yo‘nalishlari o‘zgarishi va boshqa yuzaga kelishi mumkin bo‘lgan noqulayliklardan xavotirda bo‘lgan hudud aholisining shikoyatlari tufayli rad etilgandi.
Izoh (0)