Buyuk Britaniya Tashqi ishlar vazirligi Rossiya bilan aloqador 56 nafar shaxs va tashkilotga qarshi yangi sanksiyalar paketi qabul qilinganini e’lon qildi.
Rossiyaning jismoniy va yuridik shaxslari bilan bir qatorda Xitoyning 10 ta, Turkiyaning 1 ta va Markaziy Osiyo davlatlarining 7 ta kompaniyasiga cheklov kiritildi. Ushbu cheklovlar Rossiya harbiy sanoatida foydalaniladigan dronlar uchun butlovchi qismlar, elektronika va qurilmalar yetkazib berganlik uchun kiritilgani qayd etilgan.
O‘zbekistonda 2018-yilda ro‘yxatdan o‘tgan Uzstanex kompaniyasi ham sanksiyalar ro‘yxatidan joy olgan. Avvalroq Qo‘shma Shtatlar ham mazkur kompaniyaga nisbatan sanksiyalar joriy qilgan edi.
Uzstanex mexanik dastgohlar savdosi bilan shug‘ullanadi. Uning ustav fondi 65 mln so‘m bo‘lib, yagona ta’sischisi Vasiliy Abramovdir. Korxona Toshkent shahrining Yashnobod tumanida joylashgan.
AQSH G‘aznachilik departamenti mazkur dastgohlar Rossiyaga yetkazib berilganini ma’lum qildi. Tegishli faoliyat bilan Qozog‘istondagi Kazstanex kompaniyasi ham shug‘ullangan. 2014-yilda ro‘yxatdan o‘tgan mazkur kompaniya ta’sischisi ham Vasiliy Abramov hisoblanadi. Tovarlar Xitoyda joylashgan Shanghai Winsun Imp va Exp Co Ltd (Shanghai Winsun) orqali Rossiyaga yetkazilgan. Shu sababli sanab o‘tilgan kompaniyalarga sanksiyalar qo‘llanilgan.
2023-yil dekabrida O‘zbekistonning Mvizion kompaniyasi Britaniya sanksiyalari uchragan edi. Bir oy oldin unga qarshi Qo‘shma Shtatlar tomonidan cheklovlar kiritilgan, keyinroq, Yevropa ittifoqi hamda Yaponiya ham ushbu kompaniyani “qora ro‘yxat”ga kiritgan.
O‘zbekiston Markaziy banki rahbari Mamarizo Nurmuratov rasmiylarning sanksiyalar yuzasidan xavotirlarini qayd etgan:
“Biz o‘zimiz ham juda xavotirdamiz. Hukumat va prezident tomonidan ikkita hukumat komissiyasi tuzilgan, biri eksport-import operatsiyalarini sanksiyalar xavfi bo‘yicha nazorat qiladi, ikkinchisi pul o‘tkazmalari bilan shug‘ullanadi”.
Izoh (0)