Buyuk Britaniya Ukrainaga Rossiya hududiga hujum qilish uchun Storm Shadow qanotli raketalaridan foydalanishga ruxsat berishga qaror qildi. Bu haqda The Guardian nashri Britaniya hukumatidagi manbalariga tayanib xabar berdi.
![](/static/2024/09/12/photo_2024-09-12_16-34-57-ovlOTcdl.jpg)
Bu haqda nashr AQSH davlat kotibi Entoni Blinken va Buyuk Britaniya tashqi ishlar vaziri Devid Lemmining 11-sentyabr kuni Kiyevga qo‘shma tashrifiga bag‘ishlangan maqolasida aytib o‘tgan. Safar chog‘ida ular Ukraina prezidenti Vladimir Zelenskiy bilan uchrashib, G‘arbning uzoq masofaga mo‘ljallangan qurollarining Rossiya hududiga zarbalarini muhokama qilishgan.
Gazeta manbalarining ta’kidlashicha, Blinken va Lemmi Kiyevga Storm Shadow bo‘yicha ijobiy qaror qabul qilingani uchun birga kelgan. Shu bilan birga, agar Lemmi qarorni Kiyevda omma oldida e’lon qilganida, uning so‘zlari keraksiz provokatsiya sifatida qabul qilinishi mumkin edi.
Nashrning qo‘shimcha qilishicha, Ukrainaning raketalardan foydalanishida “o‘ylamasdan yoki keraksiz hujumlarning oldini olish uchun” cheklovlar o‘rnatiladi. Blinken Qo‘shma Shtatlar birinchi kundanoq Ukrainadagi jang maydonidagi vaziyatga qarab o‘z siyosatini moslashtirishga tayyor bo‘lganini ma’lum qilgan.
“Blinken Kiyevning urushda qanday maqsadlari borligi va ularga erishish uchun Vashington nima qilishi mumkinligi haqida Zelenskiy hamda boshqa ukrainalik rasmiylardan bevosita eshitishni istayotganini aytdi”, deb yozadi Reuters.
Uchrashuvdan so‘ng Zelenskiy Blinken va Lemmi bilan “juda mazmunli va uzoq suhbat” o‘tkazganini aytgan.
“Barcha asosiy masalalar muhokama qilindi, bu uzoq masofali qurollar, frontda jangovar brigadalar bilan ta’minlash va adolatli tunchlikni yaqinlashtirish bo‘yicha umumiy strategiyaga taalluqlidir”, dedi Zelenskiy.
Ukraina prezidenti bilan uchrashuvdan so‘ng Blinken Kiyevning pozitsiyasini AQSH prezidenti Jo Baydenga, Lemmi esa Buyuk Britaniya bosh vaziri Key Starmerga bayon etishga va’da bergan.
13-sentyabr kuni Vashingtonda AQSH va Buyuk Britaniya rahbarlari uchrashadi. The Guardian nashrining yozishicha, ushbu uchrashuv natijasida ular London Ukrainaga Rossiyaga zarba berish uchun Storm Shadow’dan foydalanishga ruxsat berganini ochiq e’lon qilmasliklari kutilmoqda.
Izoh (0)