Ertaga, 8-noyabrdan boshlab dunyoning yana to‘qqizta davlati fuqarolari Xitoyga vizasiz kirishlari mumkin bo‘ladi.
Xitoy hukumati joriy yil boshida boshlangan vizasiz kirish dasturini kengaytirib, Slovakiya, Norvegiya, Finlyandiya, Daniya, Islandiya, Andorra, Monako, Lixtenshteyn va Janubiy Koreyani ham ushbu dasturga qo‘shdi. Xitoy Tashqi ishlar vazirligi matbuot kotibi Lin Jian matbuot anjumani chog‘ida ta’kidlaganidek, dastur 2025-yil 31-dekabrgacha amal qiladi.
Yangi dastur 2024-yilning yanvarida ishlay boshladi va unga asta-sekin yangi davlatlar ham qo‘shilmoqda. Yil boshidan buyon u Yevropaning 11 davlati, jumladan, Avstriya, Germaniya, Fransiya, Irlandiya, Niderlandiya, Italiya va Shveysariya, shuningdek, Malayziya fuqarolariga ham tatbiq etildi. Iyun oyi oxirida ro‘yxatga Polsha, Avstraliya va Yangi Zelandiya qo‘shildi. Dastur shartlariga ko‘ra, unga kiritilgan barcha davlat fuqarolari Xitoyga o‘zlarining oddiy pasportlari bilan kirib, mamlakatda 15 kungacha vizasiz qolishlari mumkin.
Ushbu dasturning kengaytirilishi sayyohlar oqimini oshirishi kutilmoqda. 2019-yilda, COVID-19 pandemiyasidan oldin, Xitoyga boshqa mamlakatlardan 49,1 millionga yaqin sayyoh tashrif buyurgan. 2024-yilning birinchi yetti oyida xorijiy sayyohlar soni 17,25 millionga yetdi, birinchi yarim yillikda vizasiz kirish dasturiga qo‘shilgan mamlakatlardan kelgan sayyohlar soni 8,5 million kishini tashkil etdi.
Bu o‘tgan yilning shu davriga nisbatan 190 foizga ko‘pdir. Yanvar-sentyabr oylarida Xitoyga 8,18 million xorijiy sayyoh tashrif buyurdi, ulardan 4,9 millioni vizasiz dastur doirasida kelgan sayyohlar. Bu ko‘rsatkich o‘tgan yilning shu davriga nisbatan qariyb 80 foizga ko‘pdir. Xitoyga eng faol tashrif buyuruvchilar Janubiy Koreya fuqarolari: 2019- yilda 4,3 million, 2023-yilda esa 1,3 million koreyalik Xitoyga kelgan.
Xitoyda yana bir vizasiz kirish dasturi mavjud bo‘lib, undan 54 davlat, jumladan AQSH, Kanada va Buyuk Britaniya fuqarolari foydalanishi mumkin. Ushbu mamlakatlar fuqarolari Xitoyga 37 punktdan biri orqali kirib, uchinchi davlatga sayohat qilish uchun chiptaga ega bo‘lsa, mamlakatda 72 yoki 144 soat davomida vizasiz qolish imkoniyatiga ega.
Izoh (0)