Kamola Mahmudova 48 yoshida vafot etdi

Yevropa tiklanish va taraqqiyot bankining Ozarbayjondagi vakolatxonasining sobiq rahbari, o‘zbekistonlik Kamola Mahmudova 48 yoshida Londonda vafot etdi.

Kamola Mahmudova 1976-yil Toshkentda tug‘ilgan. U Khan Academy, “Ezgu amal”, “Yashil Buxoro” kabi bir qator ta’lim, ijtimoiy va xayriya loyihalarining tashabbuskori va faol ishtirokchisi edi. U 25 yildan buyon Yevropa tiklanish va taraqqiyot bankida faoliyat ko‘rsatib kelayotgandi.

Prezidentning sobiq davlat maslahatchisi, tashqi ishlar vazirining birinchi o‘rinbosari va o‘rinbosari, O‘zbekistonning Belgiya, Buyuk Britaniya va boshqa mamlakatlardagi elchisi, professor Alisher Fayzullayevning yozishicha, Kamola Mahmudova uzoq davom etgan xastalikdan so‘ng vafot etdi.

“U xalqaro Moliya tashkilotining (YTTB) xorijdagi vakolatxonasini (Ozarbayjondagi) boshqargan o‘zbekistonlik birinchi shaxs bo‘ldi. Londonda O‘zbekiston madaniyati kunlarini uyushtirgan asosiy shaxslardan biri edi. Londonda yashab, u O‘zbekistonda ham ajoyib loyihalar yaratdi, atrof-muhit, ta’lim, ijtimoiy va boshqa sohaga tegishli dasturlar uchun ancha mablag‘lar yig‘di va har bir ishda samarali natijalar ko‘rsatdi”, deydi Alisher Fayzullayev. 

“Bu O‘zbekiston uchun katta yo‘qotish. O‘zining qisqa umrida u hatto London va Ozarbayjonda yashab turib ham vatan uchun juda ko‘p ish qildi”, deb yozdi Milliy mass-mediani qo‘llab-quvvatlash va rivojlantirish jamoat fondi direktori Jahongir Azimov.

Shavkat Mirziyoyev 2020-yilda Kamola Mahmudovani xizmatlari uchun “Do‘stlik” ordeni bilan taqdirlagan.

“O‘zbekistonlik” filmining xorijda muvaffaqiyat qozongan o‘zbeklar haqidagi epizodlaridan biri Kamola Mahmudovaga bag‘ishlangan.