AQSH rasmiylarida Shimoliy Koreya qo‘shinlari Rossiyada ekanini isbotlovchi dalillar mavjud. Bu haqda AQSH mudofaa vaziri Lloyd Ostinga tayanib Reuters xabar berdi.
“Shimoliy Koreya qo‘shinlari Rossiyada ekani haqida dalillar mavjud. Ular aynan nima qilmoqda? Biz faqat taxmin qilishimiz mumkin”, dedi Ostin.
Janubiy Koreya parlamenti razvedka qo‘mitasiga ko‘ra, Shimoliy Koreyada qo‘shinlarni tayyorlash alomatlari sentyabr va oktyabr oylarida aniqlangan. Qayd etilishicha, askarlar uchun ko‘p sonli tarjimonlar yollangan. Ularga zamonaviy urush haqida tushunchaga ega emasligi sababli dronlardan qanday foydalanish o‘rgatilmoqda.
“Urush uchun saralangan askarlarning oilalari shunchalik yig‘laganki, yuzlari qattiq shikastlangan. Shimoliy Koreya rasmiylari bu oilalarni nazorat qilish va mish-mishlarga chek qo‘yish uchun boshqa joyga ko‘chirgani yoki yakkalab qo‘ygani haqida ma’lumotlar bor”, deydi janubiy koreyalik rasmiy.
Avvalroq Ukraina va Janubiy Koreya razvedka xizmatlari Shimoliy Koreya Ukrainaga qarshi urushda qatnashish uchun askarlarini yuborgani haqida xabar bergan edi. Ukraina tomoni go‘yoki Primorsk o‘lkasining Sergeyevka shahridagi poligonda Shimoliy Koreya askarlarini ko‘rsatuvchi videolarni e’lon qilgan.
Shuningdek, KXDR Rossiyaga nafaqat piyoda, balki harbiy uchuvchilarni ham jo‘natgani ma’lum bo‘ldi. Janubiy Koreya o‘z navbatida KXDR harbiylarini kuzatish va mahbuslarni so‘roq qilishda ishtirok etish uchun o‘z razvedka xodimlarini Ukrainaga o‘tkazish, shuningdek, Kiyevni qurol-yarog‘ bilan qo‘llab-quvvatlash imkoniyatlarini muhokama qilmoqda.
Izoh (0)