Amerika Qo‘shma Shtatlari Mudofaa vazirligi 50 km dan 300 km gacha parvoz qila oladigan bir martalik arzon dronlarni sotib olishni rejalashtirmoqda. Bu haqda Defence News nashri xabar berdi.
“So‘nggi mojarolar arzon, bir marta ishlatiladigan dronlarning zamonaviy jang maydoniga ta’sirini ko‘rsatdi. Mudofaa vazirligi uzoq masofalardagi nishonlarga zarba berish uchun arzon va aniq boshqariladigan qurollardan foydalanish imkoniyatiga ega bo‘lishi kerak”, deyiladi vazirlik bayonotida.
Defence News ma’lumotlariga ko‘ra, Pentagon taklif qilinayotgan dron modellarini baholash uchun dekabr oyidayoq ko‘rgazmali parvozlarini amalga oshirishni rejalashtirmoqda. Nashrning ta’kidlashicha, Amerika mudofaa vazirligi nazarda tutayotgan dronlar Ukraina va Yaqin Sharqda ko‘p miqdorda qo‘llaniladi.
Mudofaa innovatsiyalari departamentining Defence News saytiga ma’lum qilishicha, Pentagon elektron urush, razvedka, kuzatuv, shuningdek, aloqa sohalaridagi vazifalarni bajarishga qodir dronlar ishlab chiqarishdan manfaatdor. Bunday dronlarni aniqlash qiyin, shuningdek, ularning parvozlarni rejalashtirish dasturlari bilan jihozlanganligi ham muhimdir.
Pentagon qancha dron sotib olishni rejalashtirayotgani va ularning narxi qanday bo‘lishi mumkinligiga aniqlik kiritmadi. Birinchi navbatda taklif etilayotgan har bir modelning ishlash samaradorligiga e’tibor qaratish maqsad qilingan.
Izoh (0)