Turkiya prezidentining rafiqasi Emine Erdo‘g‘on AQSH rahbari Donald Trampning rafiqasi Melaniya Trampga maktub yo‘lladi. Maktubda Emine Melaniyadan Ukraina mojarosiga ko‘rsatgan e’tiborini G‘azo sektoridagi inqirozga ham ko‘rsatishni so‘radi. Bu haqda Anadolu xabar berdi.
Maktubda Emine Melaniya Tramp bilan Oq uyda bo‘lib o‘tgan 6 yil avvalgi uchrashuvini eslab, uning Rossiya prezidenti Putinga yozgan maktubiga e’tibor qaratgan.
“Bolalarning g‘amxo‘r odamlar bilan xavfsiz muhitda o‘sish huquqi hammayoqda va hamma uchun universaldir. Bu hech qanday irq, din yoki mafkuraga bog‘liq emas. Bu huquqdan mahrum bo‘lganlarga yordam berish — insoniyat oldidagi katta burch”, deb yozadi Emine.
U Melaniyaning urushda halok bo‘lgan 648 ukrainalik bolaga ko‘rsatgan e’tiborni G‘azoda ikki yil ichida 62 ming begunoh tinch aholi, jumladan 18 mingdan ortiq bola o‘limiga olib kelgan voqealarga ham e’tibor ko‘rsatishni so‘ragan.
“G‘azoda har 45 daqiqada bir bola nobud bo‘lmoqda. BMT bu hududni ‘do‘zax’ va ‘bolalar qabristoni’ deb atamoqda. Bola hayoti arzon bo‘lmasligi kerak”, dedi Turkiya birinchi xonimi.
Emine, shuningdek, G‘azoda yashayotgan bolalarning chuqur ruhiy azobda ekanini ta’kidlagan va Falastindagi bolalarning ham baxtli va ozod kelajakka haqli ekanini bildirgan. U Melaniya Trampni Isroil bosh vaziri Netanyaxuga gumanitar inqirozni to‘xtatishga chaqiruvchi maktub yuborishga ham da’vat qilgan.
“Dunyo Falastin masalasida birdek tashvishlanmoqda. Sizning chaqirig‘ingiz Falastin xalqi oldidagi tarixiy burchdir. Ona va inson sifatida sizning maktubingizdagi hissiyotlarni chuqur his qilaman va G‘azodagi bolalarga umid uchqunini yetkazishingizni tilayman”, deb xatini yakunladi Emine Erdog‘on.
Izoh (0)