“Daryo” nashri 12-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Sovuq ob havo Rossiya-Ukraina hujumlarini to‘xtatmoqdami?
So‘nggi kunlarda Ukrainaning sharqiy qismida hukm surayotgan sovuq ob-havo og‘ir harbiy texnikadan foydalanishni ko‘paytirishga sabab bo‘lmoqda, chunki yerlar qattiq muzlagan. Biroq Bloomberg agentligining yozishicha, uzoq sovuq paytida na Rossiya, na Ukraina tomonidan hujumlar sodir bo‘lishi mumkin —sovuq tufayli dronlar va radiostansiyalarning batareyalarini ikki baravar tez o‘qlashga to‘g‘ri keladi, ko‘rish darajasining yomonlashuvi esa dronlarni artilleriyani razvedka qilish va boshqarish uchun yaroqsiz holga keltirmoqda.
Yerning muzlashi g‘ildirakli va izli transport vositalaridan foydalanishning ko‘payishiga imkon bergan bo‘lsa-da, bunday havo yangi hujumni tashkil qilishdan oldin qo‘mondonlar e’tiborga olishi kerak bo‘lgan ko‘plab omillardan biridir, deb yozadi Bloomberg Londondagi Qirollik Birlashgan Xizmatlar Instituti tahlil markazi xodimi Ed Arnoldga tayanib.
2023-yil boshidan buyon G‘arb davlatlari Ukrainaga harbiy yordamni kuchaytirdi. Yangi turdagi qurollarni yetkazib berishdan tashqari, g‘arb instruktorlari tomonidan o‘qitilayotgan ukrainalik harbiylar soni ham ortmoqda. Bundan tashqari, Polsha xalqaro koalitsiya tarkibida Kiyevga 14 ta Leopard 2 tankini yetkazib berishini ma’lum qildi.
Ukrainaga g’arb tanklarini yuborish masalasida Berlin xalqaro bosim ostida qoldimi?
Germaniya kansleri Olaf Shols Ukrainaga tanklar yetkazib berish masalasida AQSH prezidenti Jo Baydenning pozitsiyasidan kelib chiqadi. Bu haqda Politico nashri Germaniyadagi manbalariga tayanib yozmoqda.
Avvalroq ikki mamlakat yetakchilari jangovar piyoda mashinalarini yuborish bo‘yicha o‘z qadamlarini muvofiqlashtirib olgan edi. Shols shu hafta Berlindagi hududiy saylovoldi mitingda Leopard tanklarini yetkazib berish “do‘stlar va ittifoqdoshlar, ayniqsa, bizning transatlantik sherigimiz, AQSH bilan” muhokama qilinishi kerak, degan edi.
Politico qayd etishicha, kanslerga Londonning Kiyevga Challenger 2 tanklarini yuborish qarori bosim o‘tkazmoqda — Buyuk Britaniya Ukrainaga G‘arbda ishlab chiqarilgan tanklarni beradigan birinchi mamlakatga aylanishi mumkin. Bundan tashqari, Polsha Ukrainaga Germaniyada ishlab chiqarilgan tanklarni yetkazib berishini e’lon qilib bo‘ldi.
Avvalroq Pentagon Ukrainaga Amerikada ishlab chiqarilgan Abrams tanklarini yubormasligini aytib, buni ular ko‘p yonilg‘i sarflashi va ulardan foydalanish qiyinligi bilan izohlagandi.Bu tanklar ko‘plab mamlakatlarda, xususan, Ispaniya, Polsha, Gretsiya, Daniya va Finlyandiyada ham bor. Ammo ularni Myunxendagi Krauss-Maffei Wegmann kompaniyasi ishlab chiqaradi, shu sababli ularni Ukrainaga yetkazib berishda ishlab chiqaruvchi mamlakatning reeksport uchun ruxsati kerak, shu munosabat bilan hozir “xalqaro bosim Berlinga qaratilgan”, deb yozgandi avvalroq Politico.
Janubiy Koreya o‘z hududida xorijiy yadro qurolini joylashtirishi yoki o‘z yadrosini ishlab chiqishi mumkin
Janubiy Koreya, agar KXDR bilan munosabatlardagi vaziyat yomonlashsa, o‘z hududida xorijiy yadro qurolini joylashtirishi yoki o‘z yadrosini ishlab chiqishi mumkin. Bu haqda mamlakat prezidenti Yun Sok Yol ma’lum qildi, deb xabar bermoqda Janubiy Koreyaning “Newsis” axborot agentligi.
Bu haqda Yun Sok Yol Janubiy Koreya mudofaa va tashqi ishlar vazirlari bilan uchrashuvda gapirdi. Vazirlarning hisobotini tinglab, prezident Seulga hujum qilingan taqdirda “100 va hatto 1000 baravar katta ko‘lamda” javob qaytarish uchun shunday harbiy kuch yaratishni buyurdi.
Yanvar oyi boshida Yun Suk Yol Seul va Vashington Amerika yadroviy qurollari ishtirokida qo‘shma mashg‘ulotlar tashkil etish imkoniyatini muhokama qilayotganini aytgan. “Yadro qurollari AQSHga tegishli bo‘lsa-da, razvedka ma’lumotlarini almashish, rejalashtirish va mashqlar birgalikda amalga oshirilishi kerak”, — degan prezident.
Yun Sok Yolning so‘zlariga ko‘ra, Vashington bu tashabbusga ijobiy qaramoqda. Mashg‘ulotlar esa Janubiy Koreyaga KXDRdan kelayotgan yadro tahdidiga tayyorgarlik ko‘rishda yordam berishi kerak. Ushbu vaziyatda KXDR rahbari Kim Chen In Seul va Vashington o‘rtasida qo‘shma mashg‘ulotlar o‘tkazish rejasini “katta xato” deb atamoqda.
O‘zbekistondagi barcha gaz zapravkalar faoliyati vaqtincha to‘xtatildi, anomal sovuq ob havoda tabiiy gaz aholi xonadonlari va ijtimoiy soha obyektlariga yetkaziladi.
Energetika vazirligi O‘zbekistondagi gaz zapravkalar faoliyati vaqtincha to‘xtatilganini e’lon qildi.Vazirlik matbuot xizmatining bildirishicha, Respublika bo‘yicha anomal sovuq harorat davom etayotganligi sababli quvurlarda gaz bosimining keskin pasayishi kuzatilmoqda.
Shu munosabat bilan tabiiy gazni birinchi navbatda aholi xonadonlari, elektr energiyasi ishlab chiqaruvchi korxonalar hamda ijtimoiy soha obyektlariga yetkazib berish choralari ko‘riladi. Shu maqsadda ayrim yirik ishlab chiqaruvchi sanoat korxonalariga tabiiy gaz yetkazib berish hajmi keskin kamaytirildi hamda avtomobillarga gaz to‘ldirish kompressor shoxobchalari faoliyati qisqa muddatga vaqtincha to‘xtatildi.
Shuningdek, ortadigan talabni to‘liq qondirish maqsadida avtobenzin va dizel yoqilg‘isi mahsulotlari qo‘shimcha miqdorlarda sotuvga chiqariladi.
Izoh (0)