Demokratik partiyadan AQSH prezidentligiga nomzod Kamala Harris uning ustuvor vazifalaridan biri Eron hech qachon yadroviy davlatga aylanmasligini ta’minlash ekanini ma’lum qildi.
Jurnalist Harrisdan AQSHning asosiy raqibi haqida so‘raganda, u Eronni aniq variant ekanligini aytdi.
“Eronning qo‘lida Amerika qoni bor. Biz Eron hech qachon yadroviy davlatga aylanish imkoniyatiga ega bo‘lmasligini ta’minlashimiz kerak – bu mening eng muhim vazifalarimdan biri”, dedi AQSH vitse-prezidenti CBS News telekanaliga bergan intervyusida.
Biroq u Eron yadroviy qurol yaratayotganiga oid dalillarni aniqlasa, Qo‘shma Shtatlar harbiy chora ko‘radimi, degan savolga javob bermagan.
Bir kun avval Pentagon rahbari Lloyd Ostin Isroil Mudofaa vazirligi rahbari Yoav Galant bilan telefon suhbatida Eronning Yaqin Sharq mintaqasidagi “beqarorlashtiruvchi harakatlari”ni muhokama qilgan edi. Ostin Qo‘shma Shtatlar Isroilning o‘zini himoya qilish huquqini qo‘llab-quvvatlashda davom etishini yana bir bor ta’kidlagan.
1-oktyabr kuni Eron Isroilga 180 dan ortiq raketa uchirgani xabar qilingandi. Isroil armiyasiga ko‘ra, snaryadlarning bir qismi tutib olingan, biroq ba’zilari ochiq joylarga tushgan. Kamida bir kishi halok bo‘lgani va ikki nafar fuqaro jarohat olgani aytilgan. Islom inqilobi qo‘riqchilari korpusiga ko‘ra, bu hujum Livandagi “Hizbulloh” guruhi yetakchilari Hasan Nasrulloh va HAMAS yetakchisi Ismoil Haniyaning o‘ldirilishiga javob bo‘lgan.
Izoh (0)