“Daryo” nashri 4-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya armiyasi frontda hujumlar sonini uch marta oshirdi
Rossiya armiyasi frontning alohida qismlarida jangovar harakatlar shiddatini sezilarli darajada oshirdi. Bu haqda Ukraina Qurolli kuchlari bosh qo‘mondoni Valeriy Zalujniy NATO va AQSHning Yevropadagi birlashgan kuchlari komandiri Kristofer Kavoli bilan telefon suhbati chog‘ida ma’lum qildi.
“Frontdagi vaziyatni muhokama qildik. U keskin, lekin nazorat ostida bo‘lib qolmoqda, — deb yozdi Zalujniy o‘z Telegram kanalida. — Dushman frontning alohida hududlarida jangovar harakatlar shiddatini uch karra — har kuni 80 ta hujumgacha oshirgan. Jangchilarimiz mahorati sabab biz mudofaani ushlab turibmiz”.
Ukraina qurolli kuchlarining 4-noyabr kuni e’lon qilingan ertalabki hisobotida aytilishicha, Rossiya armiyasi hujum harakatlarini Baxmut, Avdeyevka va Novopavlovka yo‘nalishlariga qaratgan.
AQSH va Janubiy Koreya Kim Chen In rejimiga nuqta qo‘yish bilan tahdid qildi
Shimoliy Koreya tomonidan har qanday yadro hujumi Kim Chen Inning rejimiga nuqta qo‘yadi. Bu haqda AQSH va Janubiy Koreya mudofaa vazirlari Lloyd Ostin va Li Chjon Sop ogohlantirdi.Vazirlarning so‘zlariga ko‘ra, ular Pxenyanning nomaqbul xatti-harakatlariga “qat’iy javob” ko‘rsatadi.
“Vazir Ostin va men tasdiqlaymizki, Shimoliy Koreya tomonidan har qanday yadroviy hujum, shu jumladan, taktik yadro qurolining qo‘llanilishi, nomaqbuldir va Kim Chen In rejimining tugashiga olib keladi”, — dedi Li Chjon Sop Pentagonda xavfsizlik masalalari bo‘yicha maslahatlashuv majlisidan keyin.
Lloyd Ostin va Li Chjon Sop KXDR tomonidan, Vashington va Seul fikricha, qit’alararo ballistik raketalar uchirilishi va boshqa raketa sinovlaridan keyin yig‘ilish o‘tkazgan.
Pentagon rahbariga ko‘ra, maslahatlashuvlardan keyin u va Li Chjon Sop Vigilant Storm o‘quv mashqlarini uzaytirishga qaror qilgan. Janubiy Koreya va AQSH KXDRni “o‘zining vayronkor yo‘lidan qayrilishga” chaqirdi.
Avvalroq AQSH Rossiya va Xitoy KXDRga o‘z ta’sirini o‘tkazib, uni yadro sinovlari o‘tkazish fikridan qaytarishini istayotgani ma’lum bo‘lgandi. Ayni paytda Shimoliy Koreyaning 180 dan ortiq harbiy samolyotlari harakatga kelgani aniqlanganidan so‘ng Janubiy Koreya qiruvchi samolyotlarini havoga ko‘tardi.
Bayden AQSH Eronni ozod etishini ma’lum qildi
AQSH prezidenti Jo Bayden Kaliforniyada kongressga bo‘lg‘usi oraliq saylovlarga bag‘ishlangan nutqida AQSH Eronni ozod etmoqchi ekanini ma’lum qildi, deb yozadi Bloomberg. Baydenning nutqi Iroq va Afg‘onistonda xizmat qilgan amerikalik faxriylarga tibbiy ko‘mak ko‘rsatishga bag‘ishlangan. Ammo Shu mavzuda gapirayotib, u to‘xtab shunday degan: “Xavotir olmangiz, biz Eronni ozod qilmoqchimiz”.
Shundan so‘ng prezident: “Ular juda yaqin vaqtda o‘zlarini ozod etadi”, — deya qo‘shib qo‘ydi. AQSH prezidenti nimani nazarda tutayotganiga aniqlik kiritmagan. Reuters ma’lumotlariga ko‘ra, Bayden chiqish qilgan joyga Erondagi namoyishchilarni qo‘llab-quvvatlab shiorlar ko‘tarib olgan bir necha o‘nlab kishilar kelgan.
Shundan so‘ng Eron prezidenti Ibrohim Raisiy Jo Baydenning gaplariga javoban “Eron 1979-yilgi islom inqilobi paytida ozod qilingan”, — deya munosabat bildirdi.
Qirg‘iziston MDH davlatlari chegaralari yaqinida og‘ir texnikalarni joylashtirishni taqiqlashni taklif qildi
Qirg‘iziston Xavfsizlik kengashi kotibi Marat Imonqulov Mustaqil Davlatlar Hamdo‘stligi (MDH) mamlakatlari chegaralari yaqinida og‘ir texnikalarni joylashtirishni taqiqlashni taklif qildi. Bu haqda “24.kg” xabar berdi.
MDHga a’zo davlatlar Xavfsizlik kengashlari kotiblarining yig‘ilishida Marat Imonqulov dolzarb muammo va tahdidlar kamaymayotgani, aksincha ular mutatsiyaga uchrab, ko‘p yo‘nalishli va yanada xavfli bo‘lib borayotganini ta’kidladi. Har qanday davlat turli yo‘nalishlardan zarba olib, bir zumda geosiyosiy o‘yinning nishoni yoki quroliga aylanishi mumkin, deydi u.
“Yakka bir davlat butun boshli tahdidlarga yolg‘iz dosh berolmaydi. Xalqaro xavfsizlik kimningdir agressiv ambitsiyalariga bog‘liq bo‘lmasligi kerak. Beqarorlashtirishga qaratilgan har qanday urinishlarga samarali qarshilik ko‘rsatish talab etiladi. Shu bois taraqqiyot yo‘lida barqarorlik va tinchlik manfaatlari yo‘lida o‘zaro hamkorlikni yo‘lga qo‘yish, shuningdek, murosa topish bo‘yicha Hamdo‘stlikka a’zo barcha davlatlar va jahon hamjamiyatining umumiy integrallashgan faoliyatiga ehtiyoj bor”, — degan Imonqulov.
Bundan tashqari, MDH formatida vakolatli tuzilmalar o‘rtasida tezkor axborot almashinuvini oshirish taklif etildi.
Izoh (0)