Rossiya mudofaa vaziri Sergey Shoygu boshchiligidagi delegatsiya Shimoliy Koreyaga tashrif buyuradi, deb xabar berdi “RIA Novosti” vazirlik bayonotiga tayanib.
“KXDR Mudofaa vazirligining taklifiga binoan Rossiya delegatsiyasi koreys xalqining 1950—1953-yillardagi milliy ozodlik urushida qozongan g‘alabasining 70 yilligiga bag‘ishlangan tantanalarda ishtirok etish uchun Koreya Xalq Demokratik Respublikasiga tashrif buyuradi”, — deyiladi vazirlik xabarida.
Tashrif 25—27-iyul kunlariga belgilangan.
Mudofaa vazirligi ushbu safar Moskva va Pxenyan o‘rtasidagi harbiy aloqalarni mustahkamlashga yordam berishini hamda ikki davlat o‘rtasidagi hamkorlikni rivojlantirishda muhim bosqichga aylanishini ta’kidladi.
2022-yil sentabr oyida AQSH razvedkasi Rossiya Shimoliy Koreyadan millionlab artilleriya snaryadlari hamda kichik va o‘rta masofali raketalarni sotib olayotgani haqida xabar bergandi. 2023-yil bahorida Pentagon Rossiya qurol-yarog‘ evaziga oziq-ovqat taklif qilish uchun Pxenyanga rasmiy delegatsiya jo‘natishni rejalashtirayotganini ma’lum qildi. Pentagon matbuot kotibi Jon Kirbi Rossiya va Shimoliy Koreya o‘rtasidagi har qanday kelishuv, jumladan, qurol-yarog‘ bitimi Birlashgan Millatlar Tashkiloti Xavfsizlik kengashi rezolyutsiyasini buzishini aytdi.
Tahlilchilar ta’kidlaganidek, Rossiya savdo bozorlarini kengaytirishga hamda yangi texnologiyalar sohasidagi hamkorlikka umid qilib, “uchinchi dunyo” davlatlari bilan munosabatlarni jonlantirishga harakat qilmoqda. Yanvar oyida Rossiya Tashqi ishlar vaziri Sergey Lavrov Belarus rahbari Aleksandr Lukashenko bilan Zimbabvega tashrif buyurgan edi.
Shuningdek, may oyi oxirida Lavrov Afrikaning Keniya, Burundi, Mozambik va Janubiy Afrika Respublikasi kabi davlatlarida bo‘lib qaytdi.
JARda 22—24-avgust kunlari BRIKS sammiti o‘tkaziladi. Unga Rossiya prezidenti Vladimir Putin ham taklif qilingan edi. Ammo Janubiy Afrika Respublikasi Putinni hibsga olishga order bergan Gaagadagi Xalqaro jinoiy sud yurisdiksiyasini tan oladi. Oxir-oqibat sammitga Putin emas, Lavrov boradigan bo‘ldi.
Izoh (0)