“Daryo” nashri 31-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
AQSH—Xitoy urushi muqarrar emas, ammo harbiy mojarodan istisno qilinmaydi
AQSHning iste’fodagi generali Jek Kin Qo‘shma Shtatlarda Xitoy bilan urush olib borish uchun yetarlicha tayyorgarlik yo‘qligini aytdi. Uning so‘zlarini Newsweek nashri keltiradi.
“Haqiqat va diqqat qilishimiz kerak bo‘lgan narsa shundaki, biz (Xitoy bilan urushga) yetarlicha tayyor emasmiz. Mintaqada samarali harbiy tiyib turuvchi kuchlarimiz yo‘q. Xitoyning kemalari, samolyotlari va raketalari AQSHnikidan ko‘p”, — deydi u.
Jek Kin Kongress Tayvanga XXRdan hujum bo‘lgan taqdirda orolni himoya qilishi kerakligini ta’kidladi. “Vashington 19 milliard dollarlik uskunalarni haligacha jo‘natgani yo‘q”, — dedi iste’fodagi general.
Bundan tashqari, u AQSH—Xitoy urushini muqarrar deb hisoblamasligini aytdi. Uning fikricha, bu yaqin kelajakda sodir bo‘lmaydi, ammo harbiy mojaro yuz berishi istisno emas.
Eslatib o‘tamiz, avvalroq AQSH armiyasi ikki yildan keyin Xitoy bilan urush boshlanishi mumkinligi haqida ogohlantirilgandi. Harbiy havo kuchlari generali Mayk Minixan bu haqda qo‘l ostidagi ofitserlarga xabar yuborgan.
Koreyalararo keskinlik vaziyati qanday yechim topadi?
AQSH Janubiy Koreyani himoya qilish uchun oddiy va yadroviy qurollardan foydalanish tarafdori, dedi Pentagon rahbari Lloyd Ostin. U Seulda Janubiy Koreya milliy mudofaa vaziri Li Chjon Sop bilan bo‘lib o‘tgan matbuot anjumanida ushbu mavzuni ko‘tardi.
“Qo‘shma Shtatlar keng qamrovli tiyib turish majburiyatiga qat’iy sodiq, bu AQSH harbiy salohiyatini, jumladan, oddiy va yadroviy qurollar, shuningdek, raketalarga qarshi mudofaadan to‘liq foydalanish kabilarni o‘z ichiga oladi”, — dedi janob Ostin.
Ayni vaziyatda AQSH va Janubiy Koreya KXDR mintaqadagi vaziyatni beqarorlashtirmoqda, degan fikrda.
Eslatib o‘tamiz Koreya yarim orolidagi vaziyat 2022-yil dekabrda Shimoliy Koreyaning dronlari Janubiy Koreya havo hududiga bostirib kirganidan keyin yana keskinlashdi. KXDR qurollari 2017-yildan beri birinchi marta Koreyalararo chegarani kesib o‘tdi. Ma‘lumotlarga ko‘ra Janubiy Koreya KXDR bilan birlashishning yangi rejasini ishlab chiqmoqchi.
Saylovlardan norozi namoyishchilar va sobiq prezidentning AQSHga safari
Braziliya sobiq prezidenti Jair Bolsonaru tarafdorlari 8-yanvar kuni Braziliya poytaxtida 2022-yilgi prezidentlik saylovlari natijalarini qayta ko‘rib chiqishni talab qilib, namoyish uyushtirgandi.
So‘nggi ma‘lumotlarga ko‘ra, sobiq prezident AQSHning olti oylik turist vizasini olish uchun ariza topshirdi. Bu uning advokati Felipe Aleksandr ma’lum qildi.
Advokatning aniqlik kiritishicha, Vashington Bolsonaruning arizasini 27-yanvar, juma kuni qabul qilgan, ariza ko‘rib chiqilayotgan vaqtda sobiq prezident AQSHda bo‘lib turibdi.
Eslatib o‘tamiz 2022-yilgi saylovda Braziliyaning amaldagi prezidenti Lula da Silva 50,8 foiz, Bolsonaru esa 49,2 foiz ovoz olgan.
8-yanvar kuni namoyishchilar maʼmuriy binolar, jumladan, Oliy sud, prezident qarorgohi va Milliy Kongress binosiga bostirib kirdi. Shaharda favqulodda holat e’lon qilindi, 1,5 mingdan ortiq odam hibsga olingan.
Bolsonaru namoyishchilarni qoralagan bo‘lsa-da, Braziliya sudi uni tartibsizliklarni tergov qilishda ayblanuvchilar ro‘yxatiga kiritdi. Prokuratura maʼlumotlariga koʻra, sobiq prezident “jamiyatni jinoyatga undash harakatini sodir etgan”.
Nukus voqealari bo‘yicha sud hukmi e‘lon qilindi
31-yanvar kuni Buxoro viloyati sudida 1−2-iyul kunlari Nukus voqealarida ayblanayotgan 22 nafar sudlanuvchiga nisbatan jinoyat ishini ko‘rib chiqish yakunlari bo‘yicha sud hukmi e’lon qilindi. Bu haqda Oliy sud matbuot xizmati xabar berdi.
Oliy Sud jurnalist Lolagul Qallixanova Jinoyat kodeksining 59-moddasiga ko‘ra 8 yil ozodlikdan mahrum qilish jazosiga, 62-moddaga asosan dastlabki qamoqda oʻtirgan 6 oy 24 kuni tayinlangan jazodan chegirilib, oʻtash uchun 7 yil-u 5 oy 6 kun ozodlikdan mahrum qilish jazosi qoldirildi va jazo 3 yil sinov muddati bilan shartli deb belgilanib, sud zalida qamoqdan ozod qilindi.
Nukusdagi tartibsizliklar yetakchisi Dauletmurat Tajimuratov 16 yilga ozodlikdan mahrum etildi. Unga jazoning dastlabki 2 yilini qamoqda, qolgan qismini qattiq tartibli koloniyada oʻtash belgilandi.
Ozodlikdan mahrum qilish jazosi bilan sudlanganlarga nisbatan tayinlangan jazo muddatlari" ular qamoqqa olingan kundan boshlab hisoblanib, jazoni umumiy tartibli koloniyalarda o‘tash belgilandi.
Bundan tashqari, sodir etilgan jinoyatlar oqibatida yetkazilgan 6,8 milliard so‘mdan ortiq zararning 256 million so‘mi qoplangani inobatga olinib, qoplanmagan 6,5 milliard so‘mdan ziyod miqdordagi moddiy zararlarni sudlanganlardan solidar tartibda undirish, o‘zlashtirish yo‘li bilan talon-toroj qilingan 228 million so‘m zararni sudlangan Dauletmurat Tajimuratovdan undirish, sudlanganlarga tegishli bo‘lib jinoyat ishi doirasida xatlovga olingan mol-mulklarni keltirilgan zararni qoplashga qaratish belgilandi.
Izoh (0)