Xitoyda eng yangi suvosti atom kemasi may oyining oxiri - iyun oyi boshida cho‘kib ketgani ma’lum bo‘ldi. Bu haqda tegishli manbalarga tayanib The Wall Street Journal (WSJ) xabar berdi.
Ushbu hodisa Uxan shahri yaqinidagi kemasozlik zavodida sodir bo‘lgan. Qayd etilishicha, Xitoy rasmiylari bu haqiqatni yashirishga harakat qilgan.
WSJ va Reuters ma’lumotlariga ko‘ra, cho‘kib ketgan kema Zhou sinfiga mansub birinchi suvosti kemasi bo‘lgan. U China State Shipbuilding Corp tomonidan Wuachang kemasozlik zavodida qurilgan. Suvosti kemasi so‘nggi marta may oyining oxirida Yanszi daryosidagi portda ko‘ringan, u yerda dengizga chiqishdan oldin jihozlanayotgan bo‘lgan. Planet Labs sun’iy yo‘ldosh suratlari iyun oyi boshida daryo tubidan ko‘tarish uchun kranlar kema cho‘kkan joyga yetib kelganini tasdiqlagan.
“Cho‘kish vaqtida suvosti kemasida yadro yoqilg‘isi bo‘lgan-bo‘lmagani noma’lum”, deydi WSJ manbalari.
Favqulodda vaziyatdan keyin suv namunalari olingani haqida hech qanday belgilar yo‘q. Shuningdek, hodisa oqibatida qurbonlar va jarohatlanganlar haqida ma’lumotlar mavjud emas.
Pentagon 2023-yilda Xitoyning harbiy qudrati to‘g‘risidagi hisobotini e’lon qilgan, unga ko‘ra 2022-yil oxirida XXRda 48 ta dizelli hujumchi suvosti kemasi va oltita yadroviy quvvatga ega bo‘lgan kemalar bo‘lgan.
South China Morning Post nashri Xitoyda harbiy-dengiz kuchlarida yadroviy kallakka ega ballistik raketalarni olib yura oladigan kamida ikkita suvosti kemasi borligini yozgan.
Izoh (0)