Agar Isroil urushdan zarar ko‘rgan G‘azo sektoridagi gumanitar vaziyatini yaxshilash uchun choralar ko‘rmasa va 30 kun ichida anklavga gumanitar yordam yetkazib berilishini ta’minlamasa, AQSH harbiy ko‘makni qisqartirishi mumkin. Bu haqda Axios xabar berdi.
13-oktyabr kuni Isroil mudofaa vaziri Yoav Galantga yuborilgan maktubda AQSH davlat kotibi Entoni Blinken va Pentagon rahbari Lloyd Ostin aniq choralar ko‘rishga va G‘azoga kelayotgan yordamni avvalgi darajagacha oshirishni ta’minlashga chaqirgan.
Sentyabr oyida G‘azoga yuborilgan yordam hajmi butun o‘tgan yil davomida eng past ko‘rsatkichga yetdi. Gumanitar vaziyatni yaxshilash uchun Isroil bugundan boshlab va 30 kun ichida aniq choralar ko‘rishi kerak, deyiladi maktubda.
Unda, shuningdek, Amerika yordamini yetkazib berishga to‘sqinlik qilayotgan mamlakatlarga harbiy yordam ko‘rsatishni taqiqlovchi AQSH qonunlari ham sanab o‘tilgan. Davlat departamenti maktubning maxfiy xususiyatga ega ekanini ta’kidladi.
Shuningdek, Isroil kuniga kamida 350 ta gumanitar yordam ortilgan yuk mashinasini o‘tkazishga, G‘azoga beshinchi o‘tish yo‘lini ochishga va favqulodda zarurat bo‘lmaganda falastinliklarni ko‘chirishga buyruq bermaslikka chaqirilgan.
Isroil rasmiysi Axios’ga “maktub qabul qilingan va Isroil xavfsizlik xodimlari tomonidan diqqat bilan ko‘rib chiqilmoqda”, dedi.
Isroil bu masalaga jiddiy qaraydi va ushbu maktubda bildirilgan xavotirlarni amerikalik hamkorlar bilan muhokama qilish niyatida, dedi u.
Izoh (0)