Pentagon rahbari Lloyd Ostinning ma’lum qilishicha, Eron “tajovuzkor harakat”ni amalga oshirib turgan bir vaqtda Qo‘shma Shtatlar Isroilni qo‘llab-quvvatlashda davom etadi.
Ostinning so‘zlariga ko‘ra, Yaqin Sharqda joylashgan Amerika qo‘shinlari “Eron tomonidan Isroil tomon uchirilgan ko‘plab raketalarni tutib olgan”.
“Biz Eronning bu dahshatli tajovuzkor harakatini qoralaymiz hamda u qo‘llab-quvvatlayotgan terroristik guruhlarni keyingi hujumlardan tiyilishga chaqiramiz”, dedi AQSH mudofaa vaziri.
Uning ta’kidlashicha, Qo‘shma Shtatlar “o‘z xalqini himoya qilish, Isroil mudofaasiga qo‘shimcha yordam ko‘rsatish va keskinlashuvning oldini olish uchun muhim imkoniyatlarga ega”. Pentagon matbuot xizmati, shuningdek, Ostinning Isroil mudofaa vaziri Yoav Galant bilan telefon orqali muloqot qilgani, uning davomida Eron raketa hujumi oqibatlari muhokama qilingani haqida xabar bergan.
Avvalroq Isroil harbiy harakatlarga sarflash uchun AQSHdan 8,7 milliard dollarlik yordam paketini olishi haqida xabar berilgan edi.
Aniqlik kiritilishicha, yordam paketi asosiy harbiy xaridlar uchun 3,5 milliard dollar va havo hujumidan mudofaa tizimlari, shuningdek, ilg‘or lazer tizimi uchun 5,2 milliard dollarni o‘z ichiga oladi.
Izoh (0)