Shimoliy Koreya Pxenyan nazdida respublikaga “ochiq-oydin dushman” bo‘lgan AQSH va Janubiy Koreyadan ehtimoliy tahdidlarga xuddi shunday tarzda javob berishga tayyor. Bu haqda Shimoliy Koreya yetakchisi Kim Chen In ma’lum qildi, deb xabar bermoqda “Koreya Ovozi” radiostansiyasi.
Kimning fikricha, Seul va Vashington Koreya yarimoroli mintaqasida o‘tkazilayotgan “keng ko‘lamli harbiy mashg‘ulotlar — mulohazasizlik” ekanini anglashi kerak. Kim Chen In bu manyovrlarni KXDRga qarshi harbiy provokatsiya deb atadi.
Shimoliy Koreya yetakchisi, shuningdek, Koreya Mehnat partiyasining bayonotini keltirib o‘tdi, unga ko‘ra, Pxenyan “yadroviy qurolga yadroviy qurol bilan javob beradi, ochiq qarshilikka ochiq qarshilik qiladi”.
“Shimoliy Koreya o‘z strategik kuchlarini tezkor javob qaytarishga shay holatda ushlab turadi”, — deya qo‘shimcha qildi u.
Kim Chen In 16-mart kuni KXDR Yapon dengiziga bir haftada to‘rtinchi bor raketa uchirganini tasdiqladi. Unga ko‘ra, “Xvason-17” qit’alararo ballistik raketasi sinovlari AQSH va Janubiy Koreyaning harbiy mashg‘ulotlariga javoban o‘tkazilgan.
13-mart kuni Janubiy Koreya va Qo‘shma Shtatlar Freedom Shield qo‘shma mashg‘ulotlarini boshladi, ular Jangchi qalqoni dala manyovrlari bilan birga o‘tkaziladi. Mashqlar 23-martgacha davom etadi. Seul va Vashington Shimoliy Koreya tomonidan ehtimoliy hujumni qaytarish uchun ssenariylarni ishlab chiqmoqda, bunda “shimoldan bo‘layotgan yadroviy va raketa tahdidlari” hisobga olinadi. Pentagon vakili, general Pet Rayderning so‘zlariga ko‘ra, manyovrlar faqat mudofaa xarakteriga ega va “mintaqadagi potensial tajovuzni oldini olish uchun mo‘ljallangan”, deb yozadi Yonhap.
KXDR esa bunday manyovrlarni “agressiv urushga tayyorgarlik” sifatida qabul qilmoqda. Fevral oyida Shimoliy Koreya Tashqi ishlar vazirligi Janubiy Koreya va AQSHni tahdidlar yuzaga kelgan taqdirda Pxenyan tomonidan “misli ko‘rilmagan va kuchli” javob berilishi haqida ogohlantirgan edi.
Izoh (0)