Yadro quroliga ega mamlakatlar ushbu turdagi qurolga 2020-yilda 72,6 milliard dollar sarflagan. Bu haqda Yadro qurolini yo‘q qilish bo‘yicha xalqaro kampaniya (ICAN) hisobotiga tayanib, “RBK” xabar berdi.
Hisobot mualliflarining ta’kidlashicha, yadro quroliga sarflangan mablag‘ miqdori 2019-yilga nisbatan 1,4 milliard dollarga ko‘paygan. Daqiqalarga hisoblaganda, mamlakatlar yadro quroli uchun har daqiqada 137 666 dollar sarflagan.
ICAN hisob-kitoblariga ko‘ra, AQSh yadroviy qurol ishlab chiqarishga eng ko‘p sarmoya kiritgan — 37,4 milliard dollar, bu Xitoy sarmoyasidan 3,7 baravar ko‘p. Xitoy 10,1 milliard dollar sarmoya bilan ikkinchi o‘rinda turibdi. Rossiya ushbu ko‘rsatkich bo‘yicha uchinchi o‘rinda. Mamlakat bir yilda 8 milliard dollar (yoki har daqiqada 15 222 dollar) sarflagan.
Yadro quroliga eng ko‘p mablag‘ sarflagan mamlakatlar beshligi Buyuk Britaniya (6,2 milliard dollar) va Fransiya (5,7 milliard dollar) bilan yakunlangan. Undan keyin Hindiston (2,48 milliard), Isroil (1,1 milliard dollar) va Pokiston (1 milliard dollar) turibdi.
Hisobotga ko‘ra, yadroviy qurol ishlab chiqarishda eng kam miqdordagi sarmoya KXDR tomonidan kiritilgan, mamlakatning bu yo‘nalishdagi xarajatlari 2020-yilda 667 million dollarni tashkil etgan.
Hisobot mualliflarining ta’kidlashicha, butun dunyo COVID-19 pandemiyasiga qarshi kurash olib borgan 2020-yilda yadro quroli ishlab chiqarish uchun xarajatlarning oshishi biznes manfaatlarigagina bog‘liq.
ICAN ma’lumotlariga ko‘ra, yuqoridagi mamlakatlarning o‘nga yaqin kompaniyasi yadroviy qurol ishlab chiqarish uchun umumiy qiymati 27,7 milliard dollarga teng bo‘lgan yangi buyurtmalarni olgan yoki mavjudlarini uzaytirgan.
Mart oyining o‘rtalarida Buyuk Britaniya hukumati yadroviy salohiyatini oshirish niyatida ekanini ma’lum qilgandi. Mamlakatning mudofaa va tashqi siyosat strategiyasida Trident ballistik raketalari uchun yadro kallaklari sonini 180 tadan 260 taga ko‘paytirish bilan davlatning yadroviy salohiyatini 40 foizga oshirish rejasi keltirilgan. Yadro zaryadlari to‘rtta Vanguard sinfidagi raketa suvosti kreyserlariga joylashtiriladi, ulardan biri doimo patrulda bo‘ladi.
Aprel oyida AQSh energetika vaziri Jenifer Grenxolm Vashington boshqa davlatlarning tajovuzkorligini oldini olish uchun yadroviy imkoniyatlarini modernizatsiya qilishi kerakligini aytgandi.
Izoh (0)