Anqaradagi TUSAS aerokosmik korporatsiya obyektiga uyushtirilgan qurolli hujum oqibatida to‘rt kishi halok bo‘ldi. Bu haqda Turkiya Ichki ishlar vazirligi rahbari Ali Yerlikaya ma’lum qildi.
Yerlikaya uch kishining o‘limi haqida xabar bergan. Ommaviy axborot vositalari terakt kamida uch kishi tomonidan amalga oshirilganini qayd etgan. Hujumchilarning ikki nafari o‘ldirilgan.
“Men bu jirkanch hujumni qoralayman. Bizning kurashimiz oxirgi terrorchi zararsizlantirilgunga qadar davom etadi”, deb yozdi Yerlikaya X ijtimoiy tarmog‘ida.
Keyinroq jurnalistlarga bergan bayonotida u o‘ldirilgan hujumchilar orasida bir erkak va bir ayol bo‘lganiga aniqlik kiritgan. Terakt sodir etganlar soni rasman ko‘rsatilmagan.
23-oktyabr kuni kechqurun TUSAS qarorgohiga kiraverishda ikkita portlash sodir bo‘ldi. Dastlabki ma’lumotlarga ko‘ra, mashina portlatilgan, otishma boshlangan, shundan so‘ng hujumchilardan kamida bittasi binoga kirgan. Turkiya matbuoti TUSAS xodimlari binoda yashiringan bo‘lishi mumkinligini yozgan.
TUSAS 1973-yilda tashkil etilgan Turkiyaning birinchi aerokosmik kompaniyasidir. U tijorat va harbiy maqsadlarda foydalanish uchun samolyotlar, vertolyotlar, dronlar va kosmik sun’iy yo‘ldoshlarni ishlab chiqaradi.
Izoh (0)