Turkiya ichki ishlar vaziri 23-mart kuni bergan bayonotida mamlakat bo‘ylab o‘tkazilgan aksilterror amaliyotlarida ISHID terrorchilik tashkilotiga aloqadorlikda gumonlangan kamida 24 nafar fuqaro hibsga olinganini maʼlum qildi. Bu haqda Anadolu nashri batafsil xabar berdi.
Xabarda aytilishicha “Bozdogan-15” tezkor operatsiyasi doirasida razvedka va terrorizmga qarshi kurash bo‘limlari maxsus xodimlari Aksaray, Bolu, Gaziantep, Istanbul, Yalova, Kilis, Sakarya va Samsun viloyatlarida tekshiruv o‘tkazgan. Shubhali fuqarolar xonadonlari tintuv qilingan.
Hozirda qo‘lga olingan 24 fuqaro tergov bosqichini o‘tamoqda. Reydlar yana davom ettirilishi maʼlum qilingan.
ISHID tashkiloti Turkiya hududida 2013-yilda taqiqlangan va terrorchi tashkilot deb eʼlon qilingan. So‘nggi o‘n yil davomida ISHID Turkiyada 10 ta xudkushlik hujumi, 7 ta terakt va to‘rtta qurolli hujum uyushtirib, 300 dan ortiq tinch aholi o‘limiga sabab bo‘lgan.
Izoh (0)