Termizda “Imom Termiziy ilmiy merosining islom sivilizatsiyasida tutgan o‘rni” mavzusiga bag‘ishlangan xalqaro ilmiy-amaliy anjuman o‘tkazilmoqda. Prezident matbuot xizmati Shavkat Mirziyoyevning ushbu anjuman ishtirokchilariga murojaatini e’lon qildi.
Unda davlat rahbari so‘nggi yillarda O‘zbekistonda islom dini rivojiga hissa qo‘shgan ko‘plab allomalar, jumladan, Imom Termiziy merosini o‘rganish va targ‘ib etish, xotirasini e’zozlash, qadamjolarini obod etish borasida ko‘plab ishlar amalga oshirilganini qayd etib o‘tdi.
Surxondaryo viloyatining Sherobod tumanida muazzam yodgorlik majmuasi barpo etilganini, Termiz shahrida Termiziy nomi bilan atalgan xalqaro ilmiy-tadqiqot markazi, o‘rta maxsus islom ta’lim muassasasi hamda Islom instituti tashkil etilganini misol qilib keltirdi.
Ushbu muassasalar tomonidan O‘zbekiston xalqaro islom akademiyasi, Islom sivilizatsiyasi markazi, Hadis ilmi maktabi va boshqa diniy ta’lim va ilmiy-tadqiqot maskanlari bilan birgalikda Imom Termiziyning hayoti va faoliyati, boy merosi chuqur o‘rganilmoqda. Allomaning asarlari ko‘p nusxalarda nashr qilinmoqda. U kishi haqida ko‘plab ilmiy tadqiqot ishlari, kitoblar, badiiy asarlar yaratilmoqda.
“Siz, azizlar anjuman kunlarida bu boradagi ishlar bilan yaqindan tanishib, shu yo‘nalishda hamkorlikni yanada kuchaytirish bo‘yicha o‘z taklif va mulohazalaringizni bildirasiz, deb ishonaman.
Biz ulug‘ allomalarning vorislari sifatida islom dinimiz tinchlik, ezgulik va insonparvarlik dini ekanini ta’kidlab, bu tengsiz boylikdan bashariyatning ezgu orzu-intilishlarini ro‘yobga chiqarish uchun birgalikda foydalanishni, uni kelgusi avlodlarga bezavol yetkazishni o‘zimizning asosiy burchimiz, deb bilamiz.
Ana shunday olijanob maqsad yo‘lida yurtimiz olimlari, ulamolari bilan birga jonbozlik ko‘rsatib kelayotgan siz, azizlarga, barcha ilm-fan namoyandalariga chuqur minnatdorlik bildiraman”, deyiladi prezident murojaatida.
Shavkat Mirziyoyev buning uchun O‘zbekistondagi yetakchi ilmiy-tadqiqot va ta’lim muassasalari eshiklari hamisha ochiqligini qayd etdi.
17—18-oktyabrga mo‘ljallangan anjuman Termiziy xalqaro ilmiy-tadqiqot markazida o‘tkazilmoqda. Unda O‘zbekistonning ko‘zga ko‘ringan islomshunos olimlari, soha mutaxassislari, ilmiy tadqiqotchilari, shuningdek, Turkiya, Qatar, Misr, BAA, Hindiston, Qirg‘iziston kabi davlatlardan tashrif buyurgan 50 dan ortiq taniqli olim va ulamolar ishtirok etmoqda.
Izoh (0)