Turkiyada ISHID terrorchilik guruhiga aʼzolikda gumonlanib bir guruh kishilar qo‘lga olingandi. Ular orasida O‘zbekiston fuqarosi ham borligi aniqlandi. Bu haqda O‘zbekistonning Istanbuldagi Bosh konsulxonasi matbuot xizmati xabar berdi.
27-mart kuni Turkiya mahalliy huquqni muhofaza qiluvchi organlari tomonidan ISHID xalqaro terrorchilik guruhiga a’zo deb gumon qilinayotgan 70 kishi ushlangani haqidagi xabarlar tarqaldi. Qo‘lga olinganlar orasida Andijon viloyatida tug‘ilgan 39 yoshli O‘zbekiston fuqarosi ham borligi aniqlangan. Advokatlar aralashuvi natijasida uning terrorchilik guruhiga aloqasi borligi haqidagi vajlar o‘z isbotini topmagan va qo‘yib yuborilgan.
Bosh konsulxona o‘z o‘rnida o‘zbekistonliklarni turli buzg‘unchi oqimlarning domiga ilinib qolmaslik uchun quyidagilarga e’tibor qaratishni tavsiya qildi:
- ekstremistik ruhdagi Telegram, Instagram, Tik-tok, YouTube va WhatsAP kanallari va saytlariga a’zo bo‘lmaslik;
- mobil telefonlarda bilib-bilmay mutaassiblik ruhidagi nashidalar (qo‘shiqlar), ma’ruzalar, suratlarni saqlamaslik va tarqatmaslik;
- elektron pochta orqali noma’lum shaxslardan kelgan diniy mazmundagi da’vat va tanishuv haqidagi takliflarga javob bermaslik.
“Zero xorijda qilingan har bir yaxshi yoki yomon xatti-harakat mamlakatimiz va xalqimizning obro‘siga, qolaversa faoliyatiga ta’sir etadi”, — deyiladi xabarda.
Mart oyining oxirlarida Turkiyaning 21 viloyatida ISHIDga qarshi o‘tkazilgan to‘rt kunlik operatsiya natijasida 50 dan ortiq kishi qo‘lga olingandi. ISHID nomidan terakt uyushtirishda gumonlanib, Qirg‘iziston va Tojikiston fuqarosi ham ushlangan.
Shunga o‘xshash operatsiyalar Turkiyada muntazam ravishda amalga oshiriladi.
Izoh (0)