Isroil yaqin 24-48 soat ichida Eronning hujumini qaytarishga tayyorlanmoqda. Bu haqda The Wall Street Journal xabar berdi.
Nashr Eron rahbariyatiga yaqin manbalarga tayanib, hujum mamlakat janubida yoki shimolida amalga oshirilishini ma‘lum qildi. Ammo operatsiya rejasi muhokama qilinayotgani uchun “hali yakuniy qaror qabul qilinmagan”.
Bir qator Amerika ommaviy axborot vositalari Eron “raketalar va dronlardan foydalangan holda keng miqyosli havo hujumini” rejalashtirayotganini yozmoqda. Shu bilan birga, bu hujumlar cheklangan bo‘lishi mumkin, chunki Tehron Vashingtonni javob harakatlariga qo‘zg‘atmoqchi emas.
Ayni paytda AQSH davlat kotibi Entoni Blinken Xitoy, Turkiya va Saudiya Arabistoni tashqi ishlar vazirlaridan vaziyatni keskinlashtirmaslik uchun Eronga bosim o‘tkazishni so‘ragan.
“Yaqin Sharqdagi vaziyat avj olish xavfidan, xususan, so‘nggi kunlarda Eron tomonidan Isroil davlati va xalqiga nisbatan qilingan tahdidlardan xavotirdamiz. Prezident (Bayden) Isroilning bu tahdidlarga qarshi kurashda xavfsizligini qat’iy qo‘llab-quvvatlashini ochiq aytdi... Bu konfliktning yanada kuchayishi nafaqat Isroil, Eron, mintaqa davlatlariga, balki butun dunyoga zarar yetkazadi”, — dedi AQSH Davlat departamenti matbuot kotibi Metyu Miller.
AQSH Markaziy razvedka boshqarmasi Isroil rasmiylarini “yaqinda sodir bo‘ladigan ommaviy hujum” haqida ogohlantirgan. Amerika rasmiylarining ta’kidlashicha, Eron kamida uchta yadroviy bomba ishlab chiqarish uchun yetarli darajada boyitilgan uranga ega. Bu haqda rasmiy ma’lumot yo‘q, ammo Eronning ballistik raketalari Isroilga zarba bera oladi.
Eron va Isroil o‘rtasidagi urush ehtimoli
Keng ko‘lamli urush boshlanishi ehtimoli Isroil 1-aprel kuni Eronning Damashqdagi konsulligiga hujum qilganidan so‘ng boshlandi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh eronlik zobit ham halok bo‘ldi. Shuningdek, uch nafar Suriya va bir nafari Livan fuqarosi vafot etdi.
Eronning BMT missiyasi zarbani terakt deb baholadi. Eron tashqi ishlar vaziri Husayn Amir Abdullahiyon mazkur hujum munosabati bilan Amerika javobgarlikka tortilishi kerakligini aytdi. Shundan keyin AQSH razvedkasi Isroilni Eronning javob zarbalaridan ogohlantirdi. Buning fonida Isroil bir qator davlatlardagi elchixonalarini vaqtinchalik yopdi va xodimlarga ishga kelmaslik so‘raldi.
Isroil bosh vaziri Binyamin Netanyaxu Eronning zarba berish tahdidiga javoban, ular har qanday ssenariyga tayyorliklarini aytdi.
Eron yillar davomida bizga qarshi bevosita va o‘z emissarlari orqali ishladi, shuning uchun ham Isroil Eron hamda uning emissarlariga qarshi mudofaa va hujumda faoliyat yuritdi. O‘zimizni qanday himoya qilishni bilamiz. Biz oddiy tamoyil asosida ish tutamiz – bizga zarar yetkazgan yoki shunday qilishni rejalashtirgan har kimga zarar yetkazamiz, — dedi Netanyaxu.
Izoh (0)