Anqaradagi Turkiya Ichki ishlar vazirligi binosi yonida sodir etilgan portlashni mamlakatda terrorchi deb tan olingan Kurdiston ishchilar partiyasining (KIP) ikki nafar a’zosi amalga oshirgan, deb xabar bermoqda TRT Haber telekanali.
O‘tkazilgan tadqiqotlar va DNK tahlillari natijasida Turkiya Ichki ishlar vazirligi terakt tashkilotchilaridan birining ismi Hasan O‘g‘uz, ikkinchisi O‘zkan Shahin ekanligini aniqladi.
Anqaradagi terakt 1-oktyabr kuni ertalab sodir etilgandi. Turkiya ichki ishlar vaziri Ali Yerlikayning so‘zlariga ko‘ra, ikki nafar terrorchi IIV Xavfsizlik Bosh boshqarmasi darvozasiga avtomobilni haydab kelib, terakt sodir etgan. Jinoyatchilardan biri o‘zini portlatgan, ikkinchisi zararsizlantirilgan. Bundan tashqari, ikki politsiyachi yengil jarohat olgan.
Hujum uchun javobgarlikni KIP a’zolari o‘z zimmasiga oldi. Bunga javoban Turkiya armiyasi Iroq shimolidagi KIP nishonlariga havodan zarba berdi. Ta’kidlanishicha, 20 ta obyekt yo‘q qilingan.
Bundan tashqari Turkiya huquq-tartibot idoralari xodimlari mamlakat bo‘ylab aksilterror operatsiyalarini o‘tkazdi va KIPga aloqadorlikda gumonlangan 100 dan ortiq odamni hibsga oldi.
Izoh (0)