Bolgariyada Istanbuldagi teraktni tashkillashtirishda ishtirok etganlikda gumon qilinib, besh kishi qo‘lga olindi. Bu haqda Deutsche Welle xabar berdi.
Prokuratura ma’lumotiga ko‘ra, qo‘lga olinganlarning uch nafari Moldova fuqarolari. Yana bir erkak va ayol esa suriyalik hamda kurd millatiga mansub. Bosh prokuror Ivan Geshev gumonlanuvchilarga “boshqa davlatdagi terrorchilik harakatlarini qo‘llab-quvvatlash” va “odam savdosi” ayblovlari qo‘yilganini aytdi. Turkiya prokuraturasi Bolgariya hukumatidan gumondorlarning bir qismini ekstraditsiya qilishni so‘ragan.
Yuqoridagi besh nafar shaxsdan to‘rt nafari 72 soat hibsga olingan, shu bilan birga ularni muddatsiz qamoqqa olish uchun sudga ariza yuborilgan. Sog‘lig‘ida muammosi bo‘lgan ayolga yengilroq profilaktika chorasi qo‘llanildi.
Hozirda hech qaysi guruh portlash uchun javobgarlikni o‘z zimmasiga olmadi. Turkiya hukumati aybni Kurdiston Ishchilar partiyasi (PKK) va uning Suriya bo‘limidagi jangarilari zimmasiga yuklagan. Har ikki guruh ham bunga aloqadorligini rad etadi.
Eslatib o‘tamiz, 13-noyabr kuni Istanbulning markaziy Beyog‘lu tumanidagi piyodalar uchun mo‘ljallangan Istiqlol ko‘chasida portlash sodir bo‘ldi. Olti kishi halok bo‘ldi, 81 kishi yaralandi. Mamlakat rasmiylari hodisani terakt sifatida baholadi. O‘zbekiston prezidenti Shavkat Mirziyoyev Istanbulda yuz bergan portlash oqibatida ko‘plab insonlar qurbon bo‘lgani va jiddiy jarohat olgani munosabati bilan Rajab Toyyib Erdo‘g‘onga ta’ziya yo‘lladi.
Mavzuga doir:
Izoh (0)