Анқарадаги TUSAS аэрокосмик корпорация объектига уюштирилган қуролли ҳужум оқибатида тўрт киши ҳалок бўлди. Бу ҳақда Туркия Ички ишлар вазирлиги раҳбари Али Ерликая маълум қилди.
Ерликая уч кишининг ўлими ҳақида хабар берган. Оммавий ахборот воситалари теракт камида уч киши томонидан амалга оширилганини қайд этган. Ҳужумчиларнинг икки нафари ўлдирилган.
“Мен бу жирканч ҳужумни қоралайман. Бизнинг курашимиз охирги террорчи зарарсизлантирилгунга қадар давом этади”, деб ёзди Ерликая Х ижтимоий тармоғида.
Кейинроқ журналистларга берган баёнотида у ўлдирилган ҳужумчилар орасида бир эркак ва бир аёл бўлганига аниқлик киритган. Теракт содир этганлар сони расман кўрсатилмаган.
23 октябрь куни кечқурун TUSAS қароргоҳига кираверишда иккита портлаш содир бўлди. Дастлабки маълумотларга кўра, машина портлатилган, отишма бошланган, шундан сўнг ҳужумчилардан камида биттаси бинога кирган. Туркия матбуоти TUSAS ходимлари бинода яширинган бўлиши мумкинлигини ёзган.
TUSAS 1973 йилда ташкил этилган Туркиянинг биринчи аэрокосмик компаниясидир. У тижорат ва ҳарбий мақсадларда фойдаланиш учун самолётлар, вертолётлар, дронлар ва космик сунъий йўлдошларни ишлаб чиқаради.
Изоҳ (0)