Turkiya havo kuchlari 3-iyul kuni Iroq shimolida Kurdiston ishchi partiyasiga aloqador 37 ta nishonni yo‘q qilgan. Bu haqda Turkiya Milliy mudofaa vazirligi bayonotiga asoslanib, Anadolu xabar berdi.
Manbada aytilishicha, chorshanba kuni Turkiya harbiylari Iroq shimolidagi tog‘li uchastkalarda havo reydlari tashkil etgan. Ularda chegara hududiga nisbatan yaqin joylashgan ko‘plab kurd harbiy istehkomlari aniqlangan.
Turk qurolli kuchlari Iroqning Metina, Gara, Hakurk, Qandil va Asos mintaqalarida yuqori darajadagi havo hujumlari tashkil etgan. Rasmiylar bu hududlarda yuqori tayyorgarlikdan o‘tgan, Turkiya ichida terakt uyushtirishni rejalashtirgan kuchlar jamlanganini aytgan.
Milliy mudofaa vazirligi aytishicha, hujumlar BMT nizomining 51-moddasiga muvofiq qonuniy mudofaa huquqi doirasida amalga oshirilgan. Operatsiya maqsadi terrorchi unsurlarni to‘xtatish, Shimoliy Iroqdagi mahalliy xalq va xavfsizlik kuchlariga qarshi teraktlarning oldini olish, shuningdek, chegara xavfsizligini taʼminlash bo‘lgan.
Operatsiyada mahalliy ishlab chiqarilgan o‘q-dorilarning maksimal miqdoridan foydalanib, g‘or, boshpana, ombor va inshootlardan iborat 37 ta nishon yo‘q qilingan. Ulardagi o‘nlab terrorchilar zararsizlantirilgan.
“Ushbu operatsiya davomida begunoh odamlar, tarixiy va madaniy boyliklar va atrof-muhitga zarar yetkazilmasligi uchun barcha choralar ko‘rildi”, — deyiladi Turkiya rasmiylari xabarida.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)