Qozon shahriga tashrifning birinchi kunida prezident Shavkat Mirziyoyev BRICS sammiti doirasida Turkiya prezidenti Rajab Toyyib Erdo‘g‘on bilan uchrashuv o‘tkazdi. Bu haqda Prezident matbuot xizmati xabar bermoqda.
Uchrashuvda O‘zbekiston—Turkiya keng qamrovli strategik sheriklik munosabatlarini yanada chuqurlashtirish bo‘yicha dolzarb masalalar atroflicha ko‘rib chiqilgan.
Ikki davlat rahbarlari siyosiy, savdo-iqtisodiy, investitsiyaviy, madaniy va gumanitar sohalardagi ko‘p qirrali hamkorlikni kengaytirish muhimligini ta’kidladi.
Prezidentlar faol muloqotlar va samarali almashinuvlarni davom ettirish zarurligini qayd etgan.
Geologiya va mineral resurslarni qazib chiqarish, elektrotexnika, mashinasozlik, sog‘liqni saqlash, ta’lim va boshqa sohalarda kooperatsiya loyihalarini ilgari surish masalalariga alohida e’tibor qaratilgan.
Qo‘shma madaniy-gumanitar tadbirlarni muntazam o‘tkazib borish zarurligi alohida ta’kidlangan. Shuningdek, yetakchilar xalqaro va mintaqaviy kun tartibining muhim jihatlari yuzasidan ham fikr almashilgan.
Avvalroq Shavkat Mirziyoyev Hindiston bosh vaziri Narendra Modi bilan uchrashgan edi.
Shavkat Mirziyoyevni ushbu sammitda ishtirok etishga Vladimir Putin taklif qilgan. O‘zbekiston prezidenti “BRICS plyus” formatidagi yalpi sessiyada nutq so‘zlaydi. Uchrashuv kun tartibidan inklyuziv va barqaror taraqqiyotni taʼminlash maqsadida xalqaro hamkorlikni kengaytirish masalalari o‘rin olgan. Shuningdek, global siyosatning dolzarb jihatlari muhokama qilinadi.
Ma’lumot uchun, BRICS birlashmasi 2006-yilda tashkil etilgan. Braziliya, Rossiya, Hindiston, Xitoy, Janubiy Afrika Respublikasi, Birlashgan Arab Amirliklari, Eron, Misr va Efiopiya uning aʼzolari hisoblanadi.
Izoh (0)